't Kin aal in t Grunnegs'

k Bin geboren op 9 september 1973 op Knoal. k Bin opgruid op t Alteveer, woar k t Grunnegs van huus uut mitkregen heb. Tot mien 34e heb k doar woond.

 

Toun k zeuven joar old was, wuir bie mie duchenne spierdystrofie vaststeld. A.g.v. dizze progressieve spierzaikte heb k liggoamelke bepaarkens. In dizze blog kin je wat lezen over duchenne en de doaraan verwante becker spierdystrofe. Der is goud mit te leven, dat is wat ik hier derover zeggen wil.

 

Sunt 2007 woon k in Stad. n Bewuste keuze, mor ingeven deur noodzoak: k wol zulfstandeg wonen en zoveul meugelk mien aigen leven laaiden. Dat kin veur mie nait in de pervinzie Grunnen, mor wel in Stad. Doar binnen drij prejekten van Fokus. Dizze organsisoatsie het landelk meer as 100 prejekten woar lu mit n liggoamelke bepaarken zulfstandeg wonen kinnen mit behold van aigen regie over heur leven.

 

In maai 2011 bin k aktief worden in de Grunneger toal, as tekstredakteur van t digitoale tiedschrift Kreuze. t Konterleren en verbetern van aander lu heur schriefwaark het mie aanzet om zulf meer te schrieven.

 

Mien aigen webstee is ooit begund as blog over mien ervoarens mit t fokuswonen, mor dat brocht mie nait genog stof tot schrieven aan. Doarom bin k mie touleggen op schrieven in de Grunneger toal. Dat kin over de Grunneger toal en kultuur goan, mor de streektoal laint zoch veur meer schrieverij. k Bin benoam aan d'loop mit t schrieven van blogs, columns en artikeln op Wikipedie.

 

k Blog nog wel over Fokus as dat zo uutkomt, en k dail wat infermoatsie derover op dizze webstee. As k nog n moal meer aandacht deraan geven wil, zel t in n aander vörm wezen. Doar ligt veurvast nog n meugelkhaid veur t schrieven van n fiktief verhoal.