't Kin aal in t Grunnegs'
Thuus » Blog » Blikken Lieske

Blikken Lieske

Gepubliceerd op 15 januari 2017 13:08

'Kinst hom in aal kleuren kopen, as t mor swaart is.' Aan dij uutsproak van Henry Ford mos k denken, toun ik n moand of wat leden mien nije rolstoule kreeg. Ik mog n kleur uutzuiken, ik kon uut vieve kaizen. Zulvergries leek mie wel goud tou, dus ik vruig om 'Platinum Silver'. Toun k hom uutèndelk kreeg, bleek dij ook swaart te wezen.

Henry zee t over t vernuimdste model van zien Ford Motor Company, de Model T. d'Eerste auto dij aan d'lopende baand en in dikke aantallen moakt wuir. 'Tin Lizzy' het de massa motorizeerd. Mor swaart was nait d'ainegste kleur. Staarker nog, van 1908 tot 1914 was de Model T zulfs haldaal nait in t swaart te kriegen. Hai was standoard leverboar in gries, gruin, blaauw en rood. In 1912 kwam der wel n ain-kleur-strategie, ale T-Fords wuiren donkerblaauw mit swaarde sputterbreden. Noa 1914 wuir veur swaart as ainegste kleur kozen, omreden dat dij vaarve t gaauwste dreuge was. Doarmit was de produksie van ain auto in n kördere tied kloar, van dij gevolgen dat der meer T-Fords baauwd en verkocht worden konden. t Zel vervast ook gekoper west wezen om mit ain kleur te waarken, den kon de verkooppries omdele en wuir n auto veur nog meer lu betoalboar.

 

En zo bleef t, totdat de verkoopsievers omdele gingen. Om meer kopers te trekken, waren vanòf 1926 weer meerdere kleuren te kriegen, mor dat holp nait meer. Blikken Lieske was inhoald deur de tied. In de negentien joar dat Henry Ford zien gaisteskind beston, wuir der sikkom niks doan om t model wieder te ontwikkeln en te verbetern. De Model T was technisch verolderd en nait meer in trek bie lu dij tou waren aan n nije auto. In 1927, noadat der dik 15 miljoun stuks van moakt waren, luip de leste van de baand òf. Zien opvolger, de Model A, was leverboar in vaar standoard kleuren. Doar was swaart nait bie.

 

As t bie mien rolstoule nou ook zo was as bie de A-Ford, haar ik hom vervast wel in t zulvergries kregen. Nou wil k wieder nait over n kleur soezen. t Is gain mode-artikel en k mout t der n joar of mit doun. n Rolstoule huift nait opvalen, dij der in zit mout d'aandacht trekken (of nait, vanzulf). Swaart is mie net zo goud, mor haar mie den nait kaizen loaten.

(uut Kreuze 44, september 2012, biewaarkt op 22 jannewoarie 2017)


«   »

Reactie plaatsen

Reacties

Er zijn geen reacties geplaatst.