't Kin aal in t Grunnegs'

Jongedieks eerste

Gepubliceerd op 4 juni 2011 16:39

Op d'leste Dag van de Grunneger toal kondegde Edwin Jongedijk aan, dat zien eerste solo-album uutkommen ging. Zien debuut as tekstschriever in de Grunneger toal, want as veurman van de country-rockband Taneytown het e al waark in t Engels òfleverd.

n Officiële prezentoatsie is der nait west, mor veuròf aan d'uutgoave ston der n stukkie in t Dagblad van het Noorden. Meer was ook neudeg veur dij op 19 meert bie zien optreden was. Dat was n schier veurpruifje van t produkt dat nou in de winkel ligt.

 

Zien eerste tekst ontston op n miesderge zundag, toun e der nait uutkwam bie t schrieven van n nummer in t Engels. Toun hom n Grunnegstoalege zin in t zin schoot, was der al gaauw n laid kloar. Der volgden meer en doar kreeg e zukse pozitieve reaksies op dat hai der eernsachteg mit aan d'loop ging.

 

Mit As ik de kaans zol kriegen haar Jongedijk vleden joar al n nummer 1-hit in de Noord 19. t Gelieknoamege album kin doar staarke opvolgers veur levern. Astoe aan mie denkst staait ook alweer n week of wat in ons aigenzinnege hitlieste.

 

Noast twaalf aander nummers, staait t tuttellaid der twij moal op. d'Ingetogen live-uutvoeren van de Dag van de Grunneger meziek 2010 is op t album ook nog uutwaarkt tot n krachtege popsong. Baaide versies kinnen hail goud noast nander bestoan, zunder nander geweld aan te doun. n Dubbelstaark nummer, dat grotendails t haile album kerakterizeert. Mit n donkerbroene, schuurpepieren stem brengt hai rustege ballads en stevege pop-rocklaidjes. De teksten binnen voak wat melancholiek, mainsttied over onvervulde wènstegheden, mor binnen nait swoarmoudeg. d'Örgelpertijen in t snellere waark geven n schier roeg raandje.

 

Zien aigen nummers binnen staark, moar ook de twij covers klinken goud. t Zel meschain kommen t deurdat ik t originele Tomorrow is a long time van Bob Dylan nait ken, mor Jongedijk zien Huuswoarts klinkt mie as n aigen nummer in d'oren. Mit Oadem mien oadem (in t Nederlands n hit veur Peter Schaap) heb k dat gevuil nait zo, mor hai het der wel n schiere akoestische versie van moakt.

 

Jongedijk is n allochtone Grunneger. Geboren in t Nedersaksische dail van Vraisland, opgruid in Drìnte en tien joar leden deelstreken in Nij-Pekel. As hai prat, heurst dat t Grunnegers nait zien moudertaal is. Mor as zanger het e t zo stief omaarmd, dast zien woare òfkomst nait opmaarkst. Bloots n enkeld woord zel t verroaden, mor meschain most dat wel as nijmoods Grunnegers zain. Toalen vernijen zoch ja aalgedureg.

 

Veur As ik de kaans zol kriegen het Edwin Jongedijk zoch beïnvlouden loaten deur zanger-laidschrievers as Bob Dylan, Neil Young en Bruce Springsteen. t Is n staark album dat wel es groter wezen kon as ons pervinziegrenzen. De Grunnegstoalege popmeziek het mit Edwin Jongedijk n goie vertegenwoordeger derbie.


«   »

Reactie plaatsen

Reacties

Er zijn geen reacties geplaatst.