't Kin aal in t Grunnegs'

Grunneger legendes

Gepubliceerd op 27 november 2010 14:51

Dij begun joaren 1980 in Stad woond of stedaaierd het, mor dit markante duo nait kin, mot wel stekedoof en stokblind west wezen. Dizze leventege legendes van de Grunneger meziekboudel binnen ja wereldvernuimd in Stad en Ommelaand.

 

In 1984 binnen Peter de Haan en Frank den Hollander der mit uutschaaid, mor aiglieks binnen ze nooit vot west. Zie kwammen noa n joar of wat weer in de Bende van Baflo Bill, dij loater Voorheen De Bende wuir (vleden joar nog mit pazzipanten Harry Niehof en Jan Veldman). In tied is sikkom elke jubeleum van heur as duo vierd. Heur dattegste was den ook nait onderuut te kommen. Mor nait morzo n reüniekonsert, woarin ze d'haile riege olle hits òfwaarken. Vief joar leden was t dik feest in de Martiniploazoa, doar konden ze nooit meer overhìn kommen.

 

Veur t eerst in joaren wuiren nije laidjes schreven, woar t eerliekse Pé & Rinus-gevuil in zit. In de theoatershow Old & Nij wordt vanzulf weerom keken op dij datteg joar, mor dat kin ja ook mit nije nummers. Woar t kin, verwiezen dij wel noar t olle waark. In de Dikke rap kinst tenminzent tien direkte verwiezens noar bekende hits weer vinden. Mor as ze zo'n olle hit in dizze tied schreven haren, hou zel zukswat nou den klinken? Dat heuren we in n vernijde Carnaval in t Noorden en de 2.0-versie van Plattelandsvrouwen, dij haldaal 2010 is. Vanzulf brengen ze nog wel n poar klassiekers te heuren, want n Pé & Rinus-optreden is nooit kompleet zunder Hoornse plas, Hee doe en Baukelien.

 

De legendes binnen nog altied leventeg en hebben zuk vernijen kind, zunder te vergeten wèl en wat ze binnen. Zo kinnen nog wel n poar jubeleums vierd worden. Mit vief joar den mor weer?

 

(Tekst biewaarkt op 10 september 2018)


 »

Reactie plaatsen

Reacties

Er zijn geen reacties geplaatst.