't Kin aal in t Grunnegs'

Marlene Bakker: Meziek mit n Grunneger gevuil

Gepubliceerd op 30 oktober 2012 14:53

Marlene Bakker (1984) luip vrouger haard vot as heur voader meziek van Ede Staal draaide. Nou dut ze dat nait meer. In de tied dat ze stedaaierde aan de Fontys rock-akkedemie in Tilburg kreeg ze wat last van w├Čnsteghaid noar Grunnen. Toun het ze Ede zien meziek herontdekt, t bleek heur n gevuil van thuus te geven.

Ze von t zulfs zo schier, dat ze laidjes van hom in heur repertoire opnam. Dat dut ze wel in heur aigen stiel, ze wil nait pebaaiern in Ede zien hoed te kroepen. Marlene het doarbie n veurkeur veur zien melancholische laidjes over de laifde en over t Grunneger laand. Zelst heur nait gaauw Mien Toentje of Genoat zingen heuren. Dat paast ook nait zo goud bie heur.

 

Zo as de mainsten van heur generoatsie is Marlene nait grunnegstoaleg grootbrocht, mor ze het n goud gevuil bie t zingen in de streektoal. Ze krigt mainst ook positieve reaksies as ze optreedt mit heur Ode aan Ede. Doarom wil ze ook geern wieder mit zingen in t Grunnegers. n Eerste aanzet doarveur het ze geven mit t laid Te Nuchter. Ze haar zulf n tekst in t Nederlands schreven, mor doar zat zoveul Grunneger gevuil in, dat der n omtoalen van kommen mos. Dat mos den wel goud doan worden. In ale eerlekhaid noar zukzulf tou, wos Marlene dat heur aigen Grunnegers doar nait mans genog veur was. Mit daank aan dichter Jan Glas kreeg t laid n schiere tekst, dij toalkundeg goud is en vanzulf ook zingboar.

 

Nou wil ze wieder baauwen aan n aigen Grunneger repertoire. Dat zel minder Ede Staalachteg wezen, ze gaait meer in de richten van de indiepop, mit singersongwriter invlouden. Marlene mout heur kennis van de toal nog aal verbetern, mor doar is ze mit aan d'loop. Tot ze zowied is, kin ze nog wat hulp bruken. n Soamenwaarken mit goie Grunneger tekstschrievers paast heur den ook wel. t Zel schier wezen as dij van heur aigen generoatsie binnen, dij kinnen meschain t beste teksten aanlevern dij heur op t lief schreven binnen. Mor leeftied zegt vanzulf nait ales, gevuil veur heur stiel van meziek moaken en begriepen woarover ze zingt, dat is t veurnoamste.

 

t Is goud dat der ook nog jonge artiesten aan d'loop goan mit de streektoal. Dat mout aanpeerdjed worden en wie kinnen zo aine as Marlene Bakker doarbie goud bruken.

 

(uut Kreuze 39, november 2012, biewaarkt op 22 jannewoarie 2017)


«   »

Reactie plaatsen

Reacties

Er zijn geen reacties geplaatst.