't Kin aal in t Grunnegs'

Gadderbouk

Gepubliceerd op 10 mei 2013 14:58

Jan Glas is nait dood. Doarmit vertel k joe gain biezunder nijs, gelukkeg nait. Mor nait veul Grunnegstoalege dichters is bie t leven gund, dat heur waark bie nander gadderd wordt in ain bouk.

In de verzoamelbundel (mag k dat n gadderbouk nuimen?) Dubbel Glas binnen zien twij uutverkochte bouken bie nander brocht. Noast de gedichten uut De vangers van Zummer en Het getal Hondje, staait der waark in uut Zo is t nait goan, omtoalens van Rilke uut Sieben Nedersaksisch en wat nij waark. In t bouk binnen ook swaart-wit foto's te zain, dij ook deur Glas moakt binnen.

 

Jan Glas het in t Nedersaksische toalkontraain al grode literaire priezen uutlangd kregen. In 2006 kreeg hai veur De vangers van zummer de Literaire Pries van Stichting t Grunneger Bouk, in t zulfde joar won e ook de Freudenthal Pries mit vaar nije gedichten. De DvhN Streektoalpries 2006 was ook veur hom, as ain van soamenstellers van De 100 mooiste Groningse gedichten. In 2008 kreeg Glas t Belcampo stipendium uutlangd.

 

Zien gadderbouk het hom dit joar ook weer de DvhN Streektoalpries in de kategorie poëzie en proza aanbrocht. Lesten april mog e de pries in ontvangst nemen.

 

Glas mag n ambassadeur van d'hedendoagse Grunneger poëzie nuimd worden, den ook boeten ons pervinzie krigt e aandacht. Aankommen juni is hai ain van de dailnemers aan t 44e Poetry International Festival in Rötterdam, doar e ook uut zien Grunnegstoalege waark veurdroagen zel.

 

Jan Glas en zien uutgever Kleine Uil binnen bie de tied. Dubbel Glas is, hail nijmoods, ook verkriegboar as e-book. Dat kon wel es n nijloodje wezen in de Grunneger literoatuur.

 

Jan Glas kin n braid pebliek aanspreken en dat is goud veur de Grunneger toal.

(uut Kreuze 42, maai 2013, biewaarkt op 22 jannewoarie 2017)


«   »

Reactie plaatsen

Reacties

Er zijn geen reacties geplaatst.