't Kin aal in t Grunnegs'
Thuus » Blog » Stinkerij

Stinkerij

Gepubliceerd op 3 maart 2016 19:30

n Adl-assistente van Fokus zee n moal dat der smangs zo'n apaarde roek bie mien veurdeure hong. k Heb t ook wel es roken, mor kon nait thuusbrengen wat t was. Zo'n schaarbe neuze heb k ook nait. Wie hebben t mor holden op stinkerij van de Domino's Pizza woar k liek boven woon. Gek genog rook ik niks op t balkon.

Lestdoags wuir bie mie aanbeld. Ik lag nog op bèrre, mor mien hulp was der al, dij dee de deure lös. Der waren gounent, t zellen plietsies west wezen, dij vruigen of ik beld haar dat der bie mien noabers al n zet gain leventeghaid was. Mor ik moak mie gain zörge om n huus woar k al n joar (of was t al aanderhaalf?) gain leventeghaid zain of heurd heb. Sunt dat dij vraauw mit heur drij jackrussellterriërs deruut zet is, is t der al moessiestil. k Heb oeit nog es van n bezörger n waskemand aannomen veur n noaber dij noeit kommen is.

 

Dij kirrels bie deure vruigen woar of mien balkon zat en of ze doarlangs konden om hiernoast te kieken. Dat kin nait, aans haar k vervast wel waiten of der wat loos was. Zie hebben zoch wel tougang moakt, want loater was der wel leventeghaid. Der zat n wietkwekerij, dij hebben ze vothoald.

 

Meschain is t wel n interessante vroage veur adl'ers: hou goan je dermit om as n cliënt mit zuksoort dingen aan d'loop is? t Idee achter Fokus is dat cliënten heur leven zulf inrichten en dat Fokus zoch doar nait mit bemuit.

 

k Heb dervan heurd dat aargens (nait hier, bie n prejekt op n aander stee in t laand) n moal n Fokus-cliënt inderdoad aanholden en vastzet is veur t hebben van zo'n kwekerij. Dij zel den ook tot t huus uutzet wezen, zo as t heurt. Dat is wat mie aangaait t toppunt van integroatsie. Net as dit bericht op Beijumnieuws.


«   »

Reactie plaatsen

Reacties

Er zijn geen reacties geplaatst.