't Kin aal in t Grunnegs'

Streektoal uut t klaslokoal

Gepubliceerd op 7 november 2016 16:28

Van 1987 t/m 2011 wuir in de gemainte Stadsknoal joarleks n Grunneger Schriefwedstried organiseerd. Aan aal dij 25 wedstrieden hebben kinder van de St. Antoniusschoule op Muzzelknoal mitdoan. Dat ging altied onder de bezielende laaiden van direkteur Rinus Allemekinders. Hai is geboren in Kwadendamme in Zeeland, mor as Grunneger opgruid in Nij-Pekel. t Grunnegers is zien moudertoal worden en hai vuilt zoch staark verbonden mit ons pervinzie.

Om t belaang van joen aigen toal onder d'aandacht van t jonkvolk te brengen, het meester Allemekinders de leerlingen van groep aachte aanpeerdjed om in t Grunnegers te schrieven. t Mitdoun aan de Grunneger Schriefwedstried het veul priezen en eervolle vermeldens aanbrocht. In Wel schrift dij blift binnen dij verhoalen bie nander gadderd. In de subtitel belooft t boukje Schiere schrieverij op de St. Antoniusschool in Muzzelknoal.

 

De spèllen is bie d'aine jonge schriever wat beter verzörgd as bie d'aandere, mor in t algemain wiekt t òf van de regels dij Siemon Reker in 1984 op schrift zet het. In dij tied (mor ook nou nog) wozzen veul lu nait dat dij spèllensregels der waren. En de dikke Ter Loan staait vanzulf ook nait bie elkenaine in de boukenkaaste. Het meester Rinus t mainst op zien gevuil waarkt en wuir der bie de Schriefwedstried wieder nait noar keken? t Is vervast ook te veul vroagd veur aachtstegroepers dij veur t eerst, en meschain ook veur t lest, mit de Grunneger schrieftoal aan d'loop goan. Op t heden is Grunnegers proaten veur de mainste kinder der al nait meer bie. t Belaangriekste is dat de kinder der mit in aanroaken brocht binnen. Wel wait hebben ze der nog es wat aan, as t Nedersaksisch oeit nog es as landstoal erkend wordt.

 

Schaande genog wordt der al n poar joar gain Grunneger Schriefwedstried meer holden in de gemainte Knoal. Van t joar was doar wel veur t eerst n Grunneger weke. Dat was wel n goie gelegenhaid west om vernijs mit zo'n wedstried te begunnen en te kieken of op de schoulen nog wat mit t Grunnegers te doun is. Meester Rinus het zain loaten dat dat kin.

 

Rinus Allemekinders bleef ook lesgeven toun hai direkteur van de St. Antoniusschoule worden was. Tot zien leste waarkdag aan tou. Van t joar het hai noa 43 joar òfschaid nomen. t Uutgeven van Wel schrift dij blift is n eerbetoon aan dizze meester en zien inzet veur ons streektoal in t boasesonderwies.


«   »

Reactie plaatsen

Reacties

Er zijn geen reacties geplaatst.