Licht veur de duustere doagen

Gepubliceerd op 27 december 2013 om 15:09

k Heb n schiere cd wonnen bie Café Martini. Edwin Jongedijk was lestdoags te gast bie Radio Noord om n poar nummers van zien nije album Mörn Is t Weer Licht te speulen. Hai haar drij eksemploaren mitnomen om te signeren en vot te geven. Op Facebook ston n foto van Edwin, dij zien handtaiken aan t zetten was in d'albumhoes, doar konden luusteroars op reageren. Ik schreef: 'Edwin Jongedijk geft ons alvast licht veur de duustere doagen!' Dat was ain van de drij schierste reaksies, dus ik haar wonnen. n Poar doage loater haar k de cd al in huus.

 

Mit Mörn is t weer licht het hai n goud vervolg geven aan As ik de kaans zol kriegen. Net as mit zien debuutalbum uut 2011 ging n hitsingle veuròf aan de komst van de nije ploade. Mien Dörp ston van d'zummer al bovenaan in de Noord 19. De volgende nummer 1-hit is vervast in aantocht: Vief in de mörn staait nou nummer aachte in d'aigenzinnege hitlieste van RTV Noord.

 

t Album daankt zien titel nait aan van de laidjes mor aan t gevuil woarmit Jongedijk zien teksten schrift. Voak zit doar n melancholische ondertoon in. De laidjes binnen staark op t leven richt en der binnen wel es minder mooie dingen bie, zo as (laifdes)verdrait, tegenslag en wìnsteghaid. Mor t zel weer beter worden, dat geft de titel weer. Volgens Jongedijk is d`inhold van Mörn is t weer licht 'verrazzend, mor vertraauwd', mor is dat wel zo? Dat verrazzende zit den nait in zien zang of zien gitoarspul, dij binnen nait aans as aans. Doarmit legt hai weer de neudege kracht en passie in zien laidjes.

 

Veur zien teksten hoalt Jongedijk inspiroatse uut t leven, mit ook de minder schiere kaanten doarvan.Voak kommen de melancholie en t haartzeer uut de laidjes noar veuren, mor mainsttied wel mit n gevuil van t Komt Goud, wat de titel van ain van de nummers is. Ook hier binnen gain grode verrazzens te heuren, of t mout al wezen dat de teksten smangs wat persoonleker binnen.

 

Zit t verrazzende element den bie de muzikanten dij mitwaarkt hebben aan d'opnoames? Mörn is t weer licht is meer n bandploade worden as zien veurganger. Der binnen meer repetietsies aan veuròf goan en de muzikanten haren meer aigen inbreng. Dat moakt wel n verschil: de laidjes klinken net wat steveger en der zitten wat roegere raandjes aan.

 

Noast zeuven aigen nummers stoan der drij covers op t album. Weer aine van Bob Dylan (Not Dark Yet is Nait Duuster Nog worden) en van twij van zien aandere muzekoale veurbeelden: Steve Earle en Bruce Springsteen. Doar het Edwin Jongedijk goud zien best op doan om der wat aigens van te moaken. Ook dat verrast nait.

 

Goie artiesten willen zoch altied wieder ontwikkeln en pebaaiern van n nij album nog weer wat beters te moaken as van de veurege. Edwin Jongedijk het nait aans doan mit Mörn is t weer licht. t Is veur mie gain verrazzen dat dit album n staarke opvolger van As ik de kaans zol kriegen.

 

Eric, Jack, Selma en benoam Edwin, mien daank. k Loat dit album geern d'aankommende duustere doagen verlichten. En d'aandere winnoars, filesetaaierd mit joen machteg schiere pries!


«   »

Reactie plaatsen

Reacties

Er zijn geen reacties geplaatst.