't Kin aal in t Grunnegs'
Thuus » Blog » Sundoags goud

Sundoags goud

Gepubliceerd op 13 februari 2017 18:17

t Was al n zet leden dat ik aargens in Pak Ain op batterij kommen mos. Zo'n zet leden, da'k nait ains meer n jassie en dassie haar. Mien deurdeweekse goud is al joaren ook mien sundoagse goud. Om n beetje in stiel te verschienen op n oavend mít n rooie loper en brobbeltjewien, mos k eerst achter schiere klaaieroazie aan. Gelukkeg haar de kringloopwinkel net wat mie paast.

Zanger Bert Hadders en theoater VanBeresteyn in Veendam hebben n joarlekse pries in t leven roupen veur t beste Grunneger laid. t Eerste Bosklopper Gala, ter ere van dizze uutverkaizen, was lesten vrijdag bie VanBeresteyn. As laifhebber van goie Grunneger meziek mos k der vanzulf maank.

 

Op n rommelmaarkt dee Bert Hadders n biezundere veenkelonioale vondst: geluudsbanden mit Grunneger meziek. t Waren veldopnoames dij antropoloog Gradus J. Bosklopper in de joaren viefteg en zesteg moakt het. Dij bewiezen volgens Hadders dat de boakermat van de Grunneger blues, country en rock 'n roll in de Veenkelonies ligt. Dizze noaloatenschop van Bosklopper is van onschatboare weerde veur de Grunnegstoalege meziek. t Was den ook nait meer as logisch om de pries en t gala noar Bosklopper te vernuimen.

 

De vief kanshebbers op d'eerste G.J. Bosklopperbokoal en de biebeheurende pries van € 1000,- waren Jan Henk de Groot mit Bonney, Swinder mit Zundagmörn, De Troebadoers mit In de nacht, Wat Aans! mit Trilploat en Eva Waterbolk mit Joapke jong.

 

Dizzent deden ook mit om de pebliekspries, de Bé Wever Beker, mit nog vief aander laidjes: t Laifste van Wia Buze, Te min van Krödde, De rimpeling van Harry Niehof, Lözze grond van Erwin de Vries en Vrijhaid van Zuver Scheerwol. Dizze pries is n eerbetoon aan de lestdoags uut tied kommen Bé Wever. De Veendammer festivalorganizoator het zoch altied inzet veur de kultuur in zien woonstee en veur de Grunneger meziek.

 

In de twij weken veuròfgoand aan t gala binnen via de webstee van RTV Noord dik 2000 stemmen uutbrocht. Ik heb vanzulf stemd op Erwin de Vries, en dij was ain van de winnoars. Hai mos de Bé Wever Beker dailen mit de manlu van Wat Aans!, dij gelieke veul stemmen kregen. Veur t rapduo wuir t nog beter, van de vakjury kregen ze ook de Bosklopperbokoal uutlangd. t Sukses is drijdubbel, want Trilploat was al de nummer 1-hit van 2016 bie RTV Noord.

 

Vanzulf mouten winnoars heur laid te heuren brengen. Erwin de Vries haar dat al doan in zien optreden onder begelaaiden van Het Groot Nozems Show Orkest, net as Bert Hadders en wiedere gast-nozem Marlene Bakker. Noa de priesuutlangen dee Wat Aans! t mit n geluudsbaand. k Von t aiglieks wel schaande dat de genomineerden wieder nait heur laid zongen, dat haar echt n vieren van t betere Grunneger laid west. Mor t feest was der nait minder om.

 

Dij wat het, kin wat dailen: Wat Aans! besloot dat Erwin de Vries de Bé Wever Beker holden mag, onder veurwoarde dat ze n moal mit nander de studio in duken. Goan ze in dij gelegenhaidkombinoatsie aander joar weer op veur de Bosklopperbokoal?

 

t Bosklopper Gala bewist nog mor es dat de Grunneger meziek leeft, in de lift zit en t verdaint om nog meer aanpeerdjed te worden.

 

Trilploat van Wat Aans!: https://www.youtube.com/watch?v=D9s7iP7snMI

Verslag van RTV Noord: https://www.youtube.com/watch?v=Tkx-wEjhhSo


«   »

Reactie plaatsen

Reacties

Er zijn geen reacties geplaatst.