't Kin aal in t Grunnegs'
Thuus » Blog » Alweer

Alweer

Gepubliceerd op 19 februari 2017 13:12

k Was lesten vrijdag alweer in theoater VanBeresteyn. Dat vaalt aandern ook op. Noa de veurstellen luip k DvhN-verslaggever Louis van Kelckhoven tegen t lief. Hai was vleden weke, as jurylid, ook bie t Bosklopper Gala. 'Doe woonst hier zowat,' zee e tegen mie.

t Is inderdoad woar da'k voak noar VanBeresteyn goa. Zai hebben van de theoaters in de pervinzie t braidste en beste aanbod in Grunneger meziek. As Louis wait da'k doar voak kom, betaikent dat den dat hai der zulf ook mit n grode regelmoat hìn gaait?

 

Dizze veurstellen was traauwens nait in de Grunneger meziek. De grootste artiest uut t Nedersaksische toalkontraain, Daniël Lohues, gaf n optreden mit zien nijste pergram Moi. t Was n oavend noar vertraauwd resept: as n Drìntse troebadoer staait hai allenneg op t podium om zien verhoalende laidjes te zingen, zochzulf begelaaidend op akoestische gitoar of op de vleugel. Tussendeur vertelt e schiere verhoalen mit zien typische, dreuge humor.

 

Schaande genog is de tuddel van dizze blog, Alweer, ook hier n beetje van toupazen. Hai het ook wel es muzekoale pazzipanten bie zien optredens hoald, mor t idee was aiglieks altied t zulfde: de zingende verteller dij mit zien ambachtelk gemoakte laidjes bie t pad is. Doarin het e zoch al meer as genog bewezen. k Wil nait zeggen dat t n tegenvaler was, mor hai het zoch diskeer nait vernijd.

 

Hai vertèlde over zien hoat-laifdeverholden mit de blues. n Echte bluesmuzekant schient de blues over zochzulf òf te roupen. Ain van de leden van de Louisiana Blues Club zit aalgedureg in de perblemen, o.m. mit drugs en geldnood. k Gun Daniël Lohues nait dat hai in de blues belandt, mor k hoop aargens wel dat in zien verholden mit dizze meziek n regel uut n laid van hom nog weer woar wordt: En as de liefde mar blef winnen / komp 't allemaol wel goed.

 

Mainsttied koop k noa de veurstèllen t album dij derbie heurt. Dat heb k diskeer nog nait doan. In mien cd-rikje zitten elf albums dij hai in de post-Skik periode moakt het. d'Eerste twije binnen mit de Louisiana Blues Club. De negen dij doarop volgen, binnen min of meer volgens t zulfde resept moakt. t Stee veur album nummer twaalven blift veureerst leeg. As dij al op Spotify staait, goa k doar eerst luustern, den kin k hom altied nog kopen.

 

Dij nog noeit in t theoater noar Lohues west het, zel k zekerwoar aanroaden om es n moal hìn te goan. Mor as k eerlek bin, denk ik dat ik es n joar overspring. Of hai mot al zien verstaarker weer òfstovven om n stevege bluesploade op te nemen of mit n Skik 2.0 te kommen. Den bin k derbie.


«   »

Reactie plaatsen

Reacties

Bert
een jaar geleden

Kinst hom zekerwoar niks tekört doun, Hemmo. As aine zien vak verstaait, is t Daniël Lohues wel. Mor hai mag ons wel es n moal verrazzen.

Hemmo
een jaar geleden

Bert,
Hest het mooi zegt, zunder Daniel te kort te doan.!!!