't Kin aal in t Grunnegs'

Verwiefd

Gepubliceerd op 18 mei 2017 18:51

Ligt mien telent op t kontraain van verhoalen schrieven bie de flash fiction? Mien eerste schriefsel van minder as 99 woorden het al wat aandacht trokken.

t Tiedschrift Schrijven Magazine het n Facebookgroep Ultrakorte Verhalen. Doarin kinnen d'uutdoagen aangoan om n verhoal te schrieven in 99 woorden of minder. De vief schierste, beste of aanszins mainst opvalende verhoalen van de weke worden op de webstee van t blad nog es veur t voutlicht brocht.

 

k Bin lid van de Facebookgroep. Tot zowied heb k der ain verhoaltje daild. Dij is votdoadelk bie de vief biezundersten kommen. t Verhoaltje is, mit d'aander vare, hier te lezen in t Nederlands. Hieronder staait t in t Grunnegers. k Heb veur de leden van de Facebookgroep n inlaaiden schreven, ook om t Fokuswonen mor weer es te nuimen. Dij heurt nait bie t verhoal en staait ook nait op de webstee van Schrijven Magazine.

----------------

k Goa dit kört inlaaiden: Ik heb n slimme liggoamelke bepaarken, mor kin hail goud zulfstandeg wonen d.m.v. Fokuswonen. In principe bepoal k zulf hou k verzörgd wor. d'Assistenten van Fokus voeren dat uut zunder oordail of bemuien. Temìnzent, dat is de bedoulen ...

 

Verwiefd

 

'Wilst mien oksels scheren?'

'Wat?'

'Wilst mien oksels scheren? Of vinst dat roar?'

n Verboasde, sikkom geschokte, blik is t antwoord.

'Doe bist n man.'

'Joa, en? Mag n man zien oksels nait scheren?'

'Da's wel n beetje verwiefd.'

"Och, màìnst dat nou?' k pebaaier t zo eelsk meugelk te zeggen.

'Joa ... nou ...' Zie pakt toch t scheerapparoat. Dat vroagen aander kirrels zeker nait? Zie kin t ook nait goud. Ik vroag aander moal aan aine dij mien metroseksualiteit begript.

'Zo goud?'

Nou, vot mor. 'Joa. Kinst mien bainen ook doun?'


«   »

Reactie plaatsen

Reacties

Er zijn geen reacties geplaatst.