't Kin aal in t Grunnegs'
Thuus » Blog » Gehandicapte Billy Monger wil Le Mans rieden

Gehandicapte Billy Monger wil Le Mans rieden

Gepubliceerd op 18 juni 2017 19:39

Lesten april is de jonge Britse coureur Billy Monger zwoargewond roakt bie n ongeluk op t circuit Donington Park. Tiedens de Formule 4-race ree hai op hoge snelhaid achterop n sikkom stilstoande tegenstander. As gevolg van t letsel dat t achttienjoarege telent doarbie opluip, mozzen zien baaide onderbainen amputeerd worden.

Dat het hom nait zien dreum van sukses in d'autosport ontnomen. Hai wil in de toukomst dailnemen aan de 24 uur van Le Mans. En dij kaans gaait e kriegen. Hai is nuigd veur n prejekt van de Franse coureur Frédéric Sausset, dij mit zien liggoamelke bepaarkens – hai het gain onderaarms en bainen – zulf al aan Le Mans dailnomen het. Monger wordt opnomen in n eerlieks oplaaidenstrejekt: aankom november zel hai zien eerste race rieden in de VdeV Endurance Proto Series, t doul is om 2020 aan de start te stoan op t Circuit de la Sarthe.

Sausset zien race-akkedemie Un Volant Pour Tous het as doul om verschaaiden teams van gehandicapte rieders noar Le Mans te brengen. d'Akkedemie, dij in 2020 mit heur eerste inschrieven aan de start stoan wil, wordt officieel ondersteund deur de FIA (Fédération Internationale de l'Automobile), ACO (Automobile Club de l'Ouest) en de FFSA (Fédération Française de Sport Automobile).

 

MongerenSausset-1.jpg

Billy Monger (l.) en Frédéric Sausset (r.)

 

'Sunt vleden joar april heb k onopholdelk aan dit prejekt waarkt,' vertelt Sausset. 'k Mout echt weer n belangrieke uutdoagen aangoan noa t racen in La Sarthe in 2016. k Wol ook t algemaine beeld van gehandicapten veraandern. Ik denk dat t zain van de geblokte vlage in Le Mans mie dat rechtveerdegt.'

 

Joarleks zel d'akkedemie vieftien kandidoaten van over d'haile wereld aanwiezen, ze testen en twij of drij winnoars kaizen. Dij volgen den n drij-joareg trainingspergram en rieden in t leste joar in de 24 uur van Le Mans.

 

Zwitserse hallozie-moaker Richard Mille is aine van Sausset zien heufdsponsors veur dit pergram, woar volgens zeggen vanòf 2020 joarleks € 3.000.000 veur neudeg is. 'Wie mouten nog aal meer sponsors vastleggen. k Heb der vertraauwen in dat t prezenteern van ons prejekt in Le Mans der meer belangstellen veur trekt.' zegt Sausset.

 

De Fransman zel n ploug van 20 tot 15 leden soamenstellen, dij dele strikt in Blois (in de Loirevallei). d'Akkedemie krigt ook n ketoor op t Bugatti-circuit in Le Mans. Sausset zel op de körde termien nait meer racen in Le Mans. 'Wat veur mie veurgaait, is zörgen dat n eerste riedersbezetten Le Mans beroakt in 2020. As dat gebeurd is, goa k overwegen om as rieder weer te kommen op Le Mans in 2021 of 2022.'

 

t Waarven van kandidoaten is begund. Billy Monger was soam mit Frédéric Sausset op Le Mans om d'akkedemie te lanseern. De Formule 4-rieder het zien baaide onderbainen amputeerd kregen. 'Ik herstel goud van mien verwondens en ik kiek der noar uut om mie bie Frédéric te vougen in dizze akkedemie,' zegt de Brit.

 

In november worden vieftien kandidoaten test, tiedens twij drijdoagse sessies op t Bugatti-circuit. Aan t ìnde van dizze testsessies moakt de jury de winnende riedersbezetten bekend. 'Vanzulf willen we wizzeghaid hebben dat elk van dizze kandidoaten veur zochzulf geschikt is om zo'n pergram te volgen. Wie mouten ook wizze waiten dat heur bepaarkens bie nander pazen en op ons auto's aansloeten,' zegt Sausset. n Auto wordt aanpaast in december en jannewoarie.

 

Verwacht wordt dat d'eerste testrondes aan t ìnde van jannewoarie 2018 holden worden kinnen.

 

Veur tied goan Billy en Frédéric in n mandailege rit in Sausset zien Ligier JS 53 CN mitdoun aan de VdeV seizoensfinoale op Estoril.

LigierJS53CNFrdricSausset.jpgFrédéric Sausset in zien aanpaasde Ligier


«   »

Reactie plaatsen

Reacties

Er zijn geen reacties geplaatst.