t Kin aal in t Grunnegers
Thuus » Blog » Stilzitters binnen doodzitters

Stilzitters binnen doodzitters

Stilzitters binnen doodzitters

15 nov. 2017 19:54

Op t heden is aine van de nijste gezondhaidsopvattens dat zitten 't nije smoken' is. Dij n zittende leefstiel het, zo as ik, lopt n verhoogd risiko op slimme en/of dodelke zaiktes. Dat geldt nait allenneg veur rolstoulgebrukers, mor ook veur lu dij goud ter bain binnen, mor zittend waark doun. t Gevoar zit in dat gebrek aan bewegen, maint de waitenschop. Annemarie Postma vindt dat nait. Zai zugt grotere gevoaren in n verkeerd eetpetroon en wil dat mit heur nije voedingsmedel deurbreken.

Annemarie Postma het n gedailteke dwarsleasie en zit al meer as 35 joar in n rolstoule. De schriefster, columniste en veurmoaleg fotomodel (zie ston oeit op blode gat in de Playboy) nuimt zoch ook levenscoach en 'sedentair expert'. Dat leste is gewoon n dure menaaier van zeggen dat ze ervoaren het mit n zittende leefstiel. Zai is de schriefster van 'The sitting chef', n kookbouk mit adviezen en resepten dij de schoadelke gevolgen van n zittende leefstiel vermindern of wegnemen kinnen.

 

t Is vanzulf gain groot nijs dat gezond eten de boases van n gezonde leefstiel is, mor aan Postma heur inzichten liekt nog nait docht te wezen. Zai het heur 'Sit Smart' eetmethode uutdokterd aan d'haand van de nijste waitenschoppelke inzichten, uutgebraaide studie en heur aigen ervoarens. Ze is zulf t leventege bewies dat j'ook gezond en vitoal wezen kinnen as je gain mobiel of aktief leven laaiden: zie zugt der jong en stroalend uut, is slank en broest van d'energie.

 

Postma stelt datve omdenken mouten wat gezond eten aangaait en legt de principes van ‘Sit Smart’- eetmethode uut in n 288 bladzieden dik bouk. In t eerste dail geft ze n uutvoerege uutleg woarom zitten zo ongezond is. t Zol o.m. laaiden kinnen tot suker (diabetes type 2), haart- en voatzaiktes, overgewicht en depressiviteit. Vanuut dij kennis komt ze tot tien principes dij ainvoudeg in t doagelks leven tou te pazen binnen. Dij vat ze nog es soam aan t ìnde van dit eerste dail.

The_sitting_chef_binnen.jpg

t Twijde dail is heur 21-doagen menuplan mit resepten veur aal mementen van de dag en ekstroa resepten om te varieern. Zulfs tussendeurtjes en snacks stoan derin, want ook gezonde eters willen wel es wat te slikken hebben. Der stoan 80 lekkere, ainvoudege resepten in, woarmit je votdoadelk van start goan kinnen. Tenmìnzent, as de noatuurvoedingswinkel bie joe om d'houke zit, want bepoalde inholten hebben ze nait bie Appie of Jumbo.

 

t Bouk het n barokke vörmgeven, vol mit quotes, koadertjes en illustroatsies. Postma het n vlötte schriefstiel, woarin ze stoere voedingsvroagstukken helder uutstukt. Zie vermeldt d'onderzuiken derbie dij heur betoog onderbaauwen, t is dus aal konterleerboar as je doar wat muite veur doun willen. Bie de resepten binnen smoakelke foto's moakt, dij nuigen tot uutpebaaiern. Doarmit is t n aantrekkelk en tougankelk bouk. Lu dij geobsedeerd binnen deur gezond eten en superfood kinnen zoch der haldaal in uutleven. t Kin wel zwoare kost wezen veur lezers dij zoch makkelk zaiktes inbeelden. Over t aalgemain bin ik nait zo, mor toch vuil k wel es liefzere as k over daarmaandounens lees.

 

Wat veur n tekstredakteur min verteerboar is, binnen toalfouten. Dij kom k in dit bouk schaande genog ook wel tegen. t Het mien leeservoaren nait bedurven, mor toch … Dat is n risiko van uutgeven in aigen beheer. De schriefster mag doar nog wat aan doun veur n nije oploage.

 

k Haar dit bouk te lain van mien hulp, dij ook slim bezeg is mit gezond en verantwoord eten. Noar mien idee mos je zukswat mit n körreltje zolt nemen (dat is ook nait gezond, vanzulf), mor k zai wel positieve effekten van dizze eetmethode. Ik kiek der benoam praktisch tegen aan: ik haar liggoamelke klachten, dij volgens t bouk veroorzoakt worden deur t eten van bepoalde voedingsmiddeln. Dij dingen heb k minderd of stoan loaten en de klachten binnen òfnomen.

 

Vanuut dat oogpunt vin k 'The sitting chef' te rekomdaaiern, mor ik kon wel es ain van de waainegen wezen dij der zo in staait. Zo as zo voak mit zuksoort bouken en heur schrievers, is der sikkom gain middenweg in de reaksies: d'Aine is der zo van overtuugd, dat dij t as n nij evangelie aan elkenaine verkondegt, n aander zel t wegzetten as geldklopperij en n gevoar veur joen gezondhaid. Bewuster mit eten omgoan kin gain kwoad, mor ook hier geldt: aal mit moate en woar 'te' veur staait is ook nait goud. Dus toch mor n körreltje zolt derbie? Den mot t wel Himalayazolt of Keltisch zeezolt wezen …

The_sitting_chef_achter.jpg

« Vorige Volgende »

Lees meer »

Reactie plaatsen

Reacties

Er zijn geen reacties geplaatst.