t Kin aal in t Grunnegers
Thuus » Blog » Schiere erkennen

Schiere erkennen

Schiere erkennen

21 nov. 2017 15:20

Op Webloug vin je nijs en infermoatsie over aktiviteiten rond de Grunneger toal en kultuur. Doar kin je ook columns lezen van Grunnegers dij aktief binnen in de streektoal, mainst schrievers. k Bin ook vroagd as columnist. Zo kom k in n riege mit noamen as Jan Glas, Tonko Ufkes, Jan de Jong en Henk Puister, dat is n schiere erkennen van mien toalege gedountes. t Is ook goud veur mie as redakteur, dat ook mien teksten redigeerd en verbeterd worden. Doar heb ik weer wat aan veur Kreuze. k Mag ongeregeld insturen en k wait nog nait hou voak dat der n column van mie verschient. Dit is d'eerste:

Wat om handen hebben

 

Dij Grunneger toalwereld, hou kom je doar aiglieks in te lande? Veur mie is t begund mit n artikel in t Dagblad van het Noorden.

 

t Was meert 2011, k was wel tou aan wat meer invullen aan mien leven. Waark vinden was veur mie meschain nait onmeugelk, mor vuil ook zekerwoar nait tou. n (Betoalde) boan is vanzulf nait t ainegste woar joen voldounen uut hoalen kinnen, mor je mouten wat zinvols om handen hebben.

 

Mien oge vuil op n artikel in t Dagblad van het Noorden. n Artikel over n Grunneger tiedschrift mit de noam Kreuze. Kreuze? Nog noeit van heurd, wat zol dat wezen? In t artikel ston, dat ze op zuik waren noar n nije tekstredakteur.

t Belangriekste was vanzulf dat je 'wat hebben mozzen' mit de Grunneger toal. k Bin grootbrocht mit Grunnegers proaten. Lezen ging ook wel oardeg schier, mit aal bouken van Jan J. Boer dij mien ollu in d'kaaste stoan hebben. n Nuver stukkie schrieven kon k ook wel, docht ik. Dat ging den t mainst in t Nederlands. k Haar t ook al wel pebaaierd in t Grunnegers ... mor, och ... dat zel toch wel nait goud wezen ... en wèl wil dat nou lezen? Aan mien spèllen kon dat veurvast nait liggen, mit Siemon Reker zien buutswoordenboukje in huus. Dat 'wat hebben' mit de Grunneger toal, dat zat leuf ik wel goud. Ervoaren mit schrieven en tekstbewaarken was ook wel handeg, vanzulf. Ik kon t ook aal thuus achter mien aigen computer doun. Dat paasde mie net.

 

Mor es op dij webstee kieken. Joa, t kwam mie toch aargens wel bekend veur. k Zel der wel n moal veurbie kommen wezen, mor k haar der wieder nait zoveul acht op sloagen. Kreuze was ain van de best bewoarde gehaaimen in de Grunneger toalwereld.

Dat leek mie wel wat tou, dat Kreuze. Den haar k ook ja wat om handen. k Heb mor es n berichie stuurd. Doar wer positief op reageerd, kennismoaken volgde gaauw en t was ook votdoadelk bekeken: ik mos t mor worden. Doarmit haar k wat om handen.

 

Dat is zesenhaalf joar leden en t is nait meer bloots 'wat om handen hebben'. Mien beschaaiden biedroage aan de Grunneger toalwereld is toch wat meer worden. t Is n affeer veur mie worden dij veurbie goan is aan laifhebberij. t Is n belangriek onderdail van mien leven worden. n Passie, as je t zo nuimen willen. En as dij joe ainmoal pakt, pebaaier der den nog mor van lös te kommen. k Leuf nait da'k dat nog kin. En k zol t ook nait meer willen.

 

Lees ook op Webloug: dizze column, wat wieder aal deur of over mie schreven is en biedroagen van aander columnisten.

Volgende »

Lees meer »

Reactie plaatsen

Reacties

Er zijn geen reacties geplaatst.