't Kin aal in t Grunnegs'

Gruin gas geven

Gepubliceerd op 13 februari 2018 19:31

k Koop mie n aander auto. Mien Sprinter kin technisch nog wel n zet mit, mor t onderhold en t veurkommen van rost goan te duur worden. Doarbie, hou laank mag k nog mit n 15 joar olde diesel de stad in? In Nederland binnen al steden woar ze oldere diesels uut de binnenstad weren. As dat hier ook zowied komt, krieg k der bekeurens as kostenpost bie. n Onthevven zel je veurvast nait kriegen kinnen. Mor den zol t ook geld kosten goan.

Diesel rieden kin veur mie aiglieks al nait meer uut, doar mot n alternatief veur komme . k Heb kozen veur n Fiat Ducato natural power, n bus dij op CNG rieden kin. CNG betaikent Compressed Natural Gas ofwel (duur ik dat wel zeggen?) eerdgas onder druk. Veurdat je mie aan de schandpoale noageln willen, of mit pek en veren tot de pervinzie uut trappen: dat goa k nait tanken. As je n beetje n betrokken Grunneger binnen, kin je dat vanzulf nait moaken.

 

Veur CNG is n alternatief in de vörm van gruin gas. CNG is wel n schone brandstof mit n veul legere uutstöt van fienstof, NOx en CO2 in verglieken mit bezine en diesel. t Is ook n veurdailege brandstof. Noadailen binnen, dat t nog altied n fossiele brandstof is – en dus ooit n moal op is – en dat t winnen n gevoar is veur lu dij der bovenop wonen. Doarom mot je kaizen veur gruin gas.

 

Gruin gas is t duurzoame alternatief veur eerdgas en wordt moakt van biogas. Biogas wordt moakt uut o.m. slib, òfval van störtploatsen, GFT en mizze. Doarnoa wordt t zuverd en dreugd en opwoardeerd tot eerdgaskwaliteit.

 

In Stad is gruin gas bie tankstoatsions van twij moatschoppijen te koop: Bie PitPoint tank je CNG aan de pombe en zai zetten den, op verzuik, t aantal getankte kilo's CNG om noar gruin gas d.m.v. n 'groengas-certificaat'. t Aandail gruin gas gruit bie PitPoint joarleks mit 5%. Zo zellen zai binnenkört bloots nog gruin gas levern via heur CNG-stoatsions. OrangeGas is n stap wieder, doar is bie aal stoatsions allenneg nog mor gruin gas verkriegboar. In de pervinzie kin je ook nog tanken bie Holthausen op t Hoogezaand en OrangeGas in Zuudbrouk. Op t Knoal schient eerdoags ook aine te kommen.


k Heb gain kant-en-kloare rolstoulbus kocht, dij binnen mainsttied onbetoalboar. De Fiat is nou nog n bestelwoagen mit dubbele kebine en mot nog aanpaasd worden mit o.m. d'inbaauw van n lift en n spanbandensysteem veur t vastzetten van de rolstoule. k Hoop dat k der gaauw mit bie t pad kin. Mor den kin k nait meer zeggen dat ik n Mercedes mit sjefeur heb …

 


«   »

Reactie plaatsen

Reacties

Frans van Woerkom
9 maanden geleden

En in de pervinzie ook nog in Leek en over de grup in Weener, Dörpen en Assen.

Bert
9 maanden geleden

Kinst t haile laand al deur, der binnen al 140 stoatsions.