't Kin aal in t Grunnegs'
Thuus » Blog » Grootse vieren

Grootse vieren

Gepubliceerd op 19 februari 2018 19:09

De Grunneger meziek leeft, zit in de lift zit en verdaint t om meer aanpeerdjed te worden. Zo is t al joaren en dat wuir vleden joar nog mor es onderstreept deur t eerste Bosklopper Gala. t Feest rond de verkaizen van de beste Grunnegstoalege single beleefde nou zien twijde editie. Ook diskeer was t n grootse vieren van t Grunneger laid.

Begelaaid deur t Groot Van Beresteyn Orkest o.l.v. Marcel Wolthof traden o.m. de nait genomineerde artiesten Harry Niehof, Harbert Grezel en Gerry Wolthof op. Veur Gerry Wolthof, dij gewoonlek in t Engels zingt, was t weer es n betuun uutstapke in t Grunnegstoalege. Meschain mot e doar wat meer mit doun. Tussen de muzikoale gasten deur muik Bert Hadders de nominoatsies bekend. In 2017 is weer n grode verschaaidenheid aan meziek in ons streektoal verschenen. De kwaliteit is over t aalgemain hoog. Hadders het de Bosklopperbokoal in t leven roupen om tot nog betere meziek te kommen en dat was dit joar al te maarken.

 

De genomineerde nummers en artiesten:

Evenwicht - Jan Henk de Groot

Stilstoan is Mien Wins - Edwin Jongedijk en Arjan Vanderlinde

Funky Vout'n – NulViefteg

Waarkhanden - Marlene Bakker

Wie Waren Jong - Fries Wolma

Sjomp! - Wat Aans

Ze is t Padje Kwiet - Mark Brinkhuizen

Vera's Kelderbar - Arnold Veeman

Kom Eem bie Mie Zitten op Baankje – Maas en Folgerts

De Moat is Vol - Dion Bouwes

 

Marlene Bakker, Wat Aans! en Alex Luttjeboer, veurman van de band Nulviefteg brochten heur nominoatsie live te heuren.

 

Vleden joar waren vief laidjes nomineerd veur de deur de vakjury uut te langen Bosklopperbokoal en t biebeheurende bedrag van € 1000,-. Mit vief aander laidjes muiken ze den nog kaans op de pebliekspries, de Bé Wever Beker en € 500,-. Dat was nou aans: elk laid kon baaide priezen in de wacht slepen. Veur de Bé Wever Beker kon veuròf aan t Gala stemd worden via de webstee van RTV Noord.

 

Dik twijdoezend kiekers en luusteroars hebben bepoald dat Wat Aans! de Bé Wever Beker kreeg veur 'Sjomp!'. Veur t duo n goud vervolg op vleden joar, toun ze baaide priezen wonnen veur 'Trilploat'. Ik heb stemd op t nummer dij k nait zag as grootste kanshebber veur de pebliekspries, mor wel veur de Bosklopperbokoal. Zo is t ook uutkommen. Volgens de vakjury was t stoer west om de winnoar te bepoalen, mor heur oordail was dudelk: 'Waarkhanden' van Marlene Bakker is kwalitatief van n nivo dat nog nait eerder hoald is in de Grunneger meziek. Doarmit is terecht t winnende nummer.

 

De zoal was nait vol, volgens Bert Hadders deur de griep. Zol t zo wezen, of maint t pebliek dat dit n besloten feessie veur t Grunneger meziekwereldje is? Zai t meer as n schier konsert mit n verschaaidenhaid aan goie artiesten. En slim veul gala is der nait aan: t is den wel n rooie-loper-feest mit brobbeltjewien, mor hufst nait in smoking en laank klaid op batterij kommen. De dresscode is sundoags goud, veur gounent betaikent dat n slobbertrui mit n spiekerboksem. Aander moal loat k mien strikke ook mor in d'kaaste liggen.

 

k Bin nait bleven veur de afterparty, mor mit VanDeStraat, de beste Grunnegstoalege coverband (meschain ook wel d'ainegste), het t feest veurvast nog n goud vervolg kregen.


«   »

Reactie plaatsen

Reacties

Er zijn geen reacties geplaatst.