't Kin aal in t Grunnegs'
Thuus » Blog » (On-)Grunnegs goud

(On-)Grunnegs goud

Gepubliceerd op 10 maart 2018 15:21

Smangs mot je votgoan om joezulf te vinden. Marlene Bakker het Grunnen ooit verloaten om in Tilbörg n oplaaiden te volgen aan de Fontys rock-akkedemie. En dat het goud west, want t het heur wat aanbrocht: n dege ontwikkeln tot popmuzikante, mor n ook n besef van heur Grunnegs-wezen, heur verbondenhaid mit de Grunneger grond, de lu en de toal. Dat komt aal bie nander in heur Grunnegstoalege debuutalbum RAIF.

 

Dat bleek al bie Waarkhanden, d'eerste single dij vleden joar verscheen en n goie veurbode was veur wat nog kommen ging. t Laid gaait over weeromgoan noar woar joen worrels liggen, noadat je n zet votwest binnen. Wènsteghaid en angst om weer te keren kommen nander temuide in dit laid. De magie van t deur Marlene zo gelaifde Westerwolde klinkt deur in de dreumerge klanken van n striekerskwartet. t Arrangement geft t nummer n filmisch karakter. Mit de videoclip dij opnomen is in Smilke, vörmt t n mooi eerbetoon aan t stee woar Marlene opgruid is. De pracht en kracht van Waarkhanden hebben heur al sukses aanbrocht, ze kwam op nummer aine in de Noord 9 bie RTV Noord en won de Bosklopperbokoal veur beste Grunnegstoalege single van 2017.

Mit n waarm stemgeluud as heur raif en poëtische teksten, ondersteund deur de sfeervolle meziek, loat Marlene heuren dat t Grunnegers gain haarde, raauwe toal is. In Raif (t eerste nummer) bliekt heur verbondenhaid mit dij toal: 'n Toal as raif / Klinkt mie vremd en bekend'. Zo as zoveul Grunnegers van heur generoatsie het Marlene as kind de Grunneger toal nait aktief leerd, mor is ze der wel mit in aanroaken west. In heur tied in Tilbörg is de woardeern veur de toal pas kommen deur t luustern noar Ede Staal.

 

De mainste nummers op t in aigen beheer uutgeven RAIF binnen haldaal van aigen haand. Allenneg de tekst van Heufd as helm is n bewaarkt gedicht van Fieke Gosselaar en t nummer Doe waist beter is n cover van You know better van de Deense zangeres-laidschriefster Tina Dico. De rest van de teksten het Marlene grotendails zulf schreven. Toun ze in 2012 mit Te Nuchter in t Grunnegers begunde, was ze nog hulp van dichter Jan Glas neudeg om tot n goud geve tekst te kommen. In 2013 won ze mit de tekst van Smilke de daarde pries in de Grunneger Schriefwedstried. Ain regel doarin was toun 'boeten zweeft n ballet vlaigen', wat toalpuristen gain goud Grunnegers vinden. Dat is nou veraanderd in 'boeten zweeft n ballet neefkes', wat in elks geval schierder Grunnegers is. t Schrieven gaait heur aal beter òf, mor veur de zekerhaid het ze de teksten noakieken loaten deur leroar Grunnegers Hindry Schoonhoven.

 

Marlene het gain haalf waark moakt van heur debuutalbum. Zie het n goie ploug lu om heur tou gadderd om t beste uut heur meziek te hoalen. Bernard Gepken (n muzikoale pazzipant van o.m. Daniël Lohues) het as producer t album noar n hoger plan waiten te tillen. Hai is ook ain van de muzikanten dij RAIF inspeuld hebben, mit Reyer Zwart, Nicky Hustinx en Arjen de Bock, dij al mit verschaaiden goie artiesten soamenwaarkt hebben. Reyer Zwart is doarbie verantwoordelk veur de striekersarrangementen. d'Opnoames van zang en meziek binnen in meerdere studio's doan en veur t òfmixen van RAIF is de raaize moakt noar de vernuimde ICP Studio's in Brussel, woar al veul artiesten en bands uut de top van de Nederlandse popmeziek west binnen.

 

t Het n zet duurd veurdat dit album uutkwam. Der is om en bie twij joar aan waarkt, mor t was t wachten weerd. RAIF het n kwaliteit en allure dij groter binnen as wat tot zowied in de Grunneger meziek verschenen is. Doarmit zet Marlene n nije moatstaf, meschain wel veur t haile Nedersaksische toalkontraain. Grunnegstoalege artiesten hebben nog altied gain landelke bekendhaid. Zol Marlene Bakker dat deurbreken kinnen? Ze verdaint t in elks gevaal mit RAIF, dat n (on-)Grunnegs goud album is.


«   »

Reactie plaatsen

Reacties

Er zijn geen reacties geplaatst.