't Kin aal in t Grunnegs'
Thuus » Blog » Gruin gas geven (2)

Gruin gas geven (2)

Gepubliceerd op 6 mei 2018 19:11

Van nou òf aan kin k gruin gas geven, want mien nije auto is in de boane. t Was wel n put waark om hom van bedriefswoagen om te baauwen tot rolstoulbus, mor doar heb k den ook wat veur. Mainstekaans bin k nou aigender van n zeldzoam, zo nait uniek, vouertuug. Der zellen nait veul rolstoulbuzzen op gruingas in particulier gebruuk wezen. Tot zowied heb ik ze bloots zain as taxi-bus.

 

k Was al n zetje op t internet aan t strunen noar aander auto's. Nait zozeer uut noodzoak, mor wel om bie leutjen aan te bedenken wat n goie vervanger wezen kon veur mien vieftien joar olde Mercedes Sprinter. Via AutoScout24 en Mobile.de was k benoam in Duutsland aan t kieken noar twijdehands rolstoulbuzzen, doar binnen ze voak gekoper. Uutèndelk heb k toch in Nederland vonden wat mie paast. Lesten jannewoarie kwam k via GasPedaal.nl uut bie n Fiat Ducato Natural Power.

 

Hai ston in Limbörg bie n geroaziebedrief dij servicepartner van de ANWB is. Via mien konneksie bie de ANWB kon k mie n goud beeld over d'auto vörmen, zunder dat k zulf hìngoan mos te kieken. Zo as de woagen mie beschreven is, leek e mie goud tou, dus heb k hom kocht. Tot mien gelok kon k hom geschikt overnemen: in Limbörg binnen der nog nait zoveul CNG-tankstoatsions en is de spraaiden doarvan ook nait recht gunsteg. Doarom konden ze d'auto nait zo makkelk in heur aigen kontraain kwiet, dat was veur mie goud veur de pries.

t Was dus gain kant-en-kloare rolstoulbus, mor n bestelwoagen mit dubbele kebine. Bie mien aigen geroazieholder kon k hom veur t eerst in t echt bekieken. Toun was e al gedailtelk stript veur d'ombaauw. De dubbelkebine-inbaauw (schaaidenswand mit achterbaanke) was der al uut en de loadruumte leegmoakt. De grode gastank lag eerst in t midden, onder d'achterbaanke, mor was al noar de ziedkaande verploatst. Aan de boetenkaande was e van kleur veraanderd. Onderlangs was e swaart, dat bleek n wrap te wezen. Doaronder was e blaauw. Konst op de lak ook nog òfdrokken zain van de bedriefsnoam dij derop stoan het: hai het van Ballast Nedam west.

De koale loadruumte was zo'n beetje kloar veur t inrichten. In t achterdail mos n hemelbeklaiden moakt worden. Achter t holt op d'achterste ziedwanden is isoloatsiematerioal moakt en t holt zulf is bekled mit viltachteg materioal. Woar de dubbelkebine-inbaauw zeten haar, bleef n stuk koale bodem achter, doar is n holtvlouer moakt. Der zaten gain roeten in d'achterdeuren, dij heb k derin zetten loaten. Vanzulf mozzen de rolstoullift en t spanbandensysteem veur t vastzetten van de rolstoule inbaauwd worden.

 

Van boeten mos e ook wat minder bedriefswoagenachteg moakt worden. k Wil ja nait as baauwbedrief rondrieden, doarom is e onderlangs wit spoten. Wieder hof doar nait veul aan doan worden, allenneg de finishing touch aanbrengen mit nije wieldeksels en stickers van rolstoulvervoer. En n gruingas-sticker, dat je zain kinnen dat ik as bewuste en betrokken Grunneger nait op eerdgas rie.

Doarmit is e kloar om in gebruuk te nemen. k Heb n aanvroag doan veur t specioale invalidentarief veur de wegenbelasten. t Is nog even wachten op de goudkeuren van de belastendainst, mor ik kin der al wel mit bie t pad. Nou kin k allenneg nait meer noar woarhaid zeggen dat ik n Mercedes mit sjefeur heb …


«   »

Reactie plaatsen

Reacties

Henk bekker
5 maanden geleden

Gefeliciteerd met de nieuwe slee 👍 en er is vast wel een chauffeur die in een fiat kan rijden,en het hoort ook goed om tezeggen ik heb een fiat met CHAUFFEUR 👍👍

Henk Wijnholds
4 maanden geleden

Veel plezier met je nieuwe bus. Ik had hem al even in de garage gezien toen ze er mee bezig waren. Er is veel werk aan gedaan en daarom hoop ik dat je er nog lang plezier van hebt.