't Kin aal in t Grunnegs'

Sangen gevuil

Gepubliceerd op 20 juni 2012 19:15

n Grunneger tekst op Still got the Blues van Gary Moore (1952 – 2011). Van blues haar k vanzulf blaauw gevuil moaken kind, mor doarbie denk ik eerder aan blaauw van de draank of blaauw van de kolle. Doar zong Gary nait over. Hai is hier al n joar of wat zien laifste kwiet, mor zien gevuilens veur heur binnen der nog aal. Woar de kleuren van ellèn (blaauw) en laifde (rood) bie nander kommen, krieg je sangen. Doar is zien gevuil vervast mit inkleurd.

Sangen Gevuil

 

t Was altied mor even biegoan om mien haart vot te geven

Mor deur schoa en schaande bin k wies worden

t Brengt ook veul piene in dien leven

De laifde is bliekboar nait mien kammeroad

Mor nou k dat wait is t te loat

 

Zo laank, joa zo laank is t al leden

Mor k heb nog aal n sangen gevuil veur die

 

t Was altied mor even biegoan om vannijs van ain te holden

Mor deur schoa en schaande bin k wies worden

Hest der n pries veur te betoalen

De laifde is bliekboar nait morzo n spul

Dij je speulen om te winnen

Mor ook wel verlaizen kinnen

 

Zo laank, joa zo laank is t al leden

Mor k heb nog aal n sangen gevuil veur die

 

Zoveul joar leden sunt dat k in dien ogen keek

Hier in mien haart is n lege stee

Woarstoe ainmoal waarst

 

Zo laank, joa zo laank is t al leden

Mor k heb nog aal n sangen gevuil veur die

 

d’Ain dag komt, d’aander gaait

Mor gain dag dat k nait wait

Van mien sangen gevuil veur die

Verschenen in Kreuze 37, juli 2012

Tekst biewaarkt op 29 meert 2018


«   »

Reactie plaatsen

Reacties

Er zijn geen reacties geplaatst.