't Kin aal in t Grunnegs'
Thuus » Blog » Nait mishottjet

Nait mishottjet

Gepubliceerd op 30 juni 2018 19:20

In 2009 luit zangeres Irene Wilkens veur t eerst in t Grunnegs van zoch heuren. Mit heur eerste singles haar ze nog nait zoveul sukses. Noadat ze in 2014 Sikkom Kult as aigen begelaaidensband om zoch tou kreeg, is heur bekendhaid groter worden en binnen der n poar hits kommen. Sunt feberwoarie is t Grunnegstoalege debuutalbum uut. Net as de band hait ook t album Sikkom Kult. Hierop binnen elf van de schierste laidjes bie nander gadderd dij Irene en heur manlu in de leste joaren speuld hebben.

As Julio gait zingen was heur eerste hit in de Noord 9, de groadmeter van de Grunneger meziek bie RTV Noord. Laifhebbers van Bert Hadders zien meziek kennen dat laid ook van zien album De Bosklopper tapes. Haizulf von t nummer hail geschikt veur n vraauwenstem. Irene en de band hebben n aander muzikoale invullen deraan geven. Bie Hadders het t laid country-invlouden, in dizze variaant het t n minder dudelk te bepoalen stiel. Der wordt o.m. n akkordeon in bruukt, wat mie der n 'volks' gevuil bie geft. In 2015 verscheen Nooit allain, wat echt n popnummer is. In 2016 won t gezelschop t Grunneger Laidjesfestival en verscheen de single Wat west is, hier is d'akkordeon prominenter aanwezeg as bie Julio, wat n nog meer n volkse klank geft. Dizze drij suksesvolle singles stoan aal op t album.

 

Veuruutlopend op de prezentoatsie verscheen lesten jannewoarie Nog ainmoal daanzen mit die. Dizze 'powerballad' is schreven deur Jan Henk de Groot. Dij haar t al n zetje op de plaanke liggen om zulf ooit n moal op te nemen, mor doar was t tot zowied nait van kommen. t Laid het ook n onmiskenboare De Groot-signatuur, mor Irene het t zochzulf goud aigen moakt. t Is heur dikste hit tot zowied, mit n verblief van 17 weken in de Noord 9. Tegen t ènd van maai het t nummer de lieste verloaten en in juni is d'opvolger prezenteerd: t vroleke, zummers klinkende Hol die vast is de twijde officiële albumsingle. Dizze is nog nait in de Noord 9 verschenen.

 

 

Wieder bevat de cd nog zes nummers uut n braid en gevarieerd repertoire. Uut de singles bliekt al dat de meziekstiel aiglieks nait mit ain woord te omschrieven is. De zangeres is dat wel: allround. Irene Wilkens vuilt zoch bie meerdere stielen goud: blues en hardrock liggen heur net zo goud as Top 40-(pop)meziek. Ze het al in verschaaiden bands zongen, woaronder de Abba-coverband SOS. Nou het ze zoch haldaal op aigen waark toulegd en doarin voeren vlödde, vroleke poplaidjes en country-achtege ballads de boventoon. d'Aine moal raauw, d'aander moal melancholisch, smangs laif of confronterend, mor altied liek uut t haart en herkenboar.

 

t Verbindende element is de streektoal, dij heur noa aan t haart ligt. De mainste nummers worden schreven deur heur man Alex Schoenmaker. Negen teksten op Sikkom Kult binnen van zien haand. Bie de cd zit gain tekstboukje, mor dat is gain groot gemis: Irene Wilkens het n heldere en dudelke stem en n goie Grunneger uutsproak. Doarmit is goud te verstoan wat ze zingt. Grunnegs proaten dut ze nait, mor aan heur zang is dat nait te heuren.

Noast de nummers van Hadders en De Groot binnen der ook vocale biedroages van aander Grunneger artiesten: Edwin Jongedijk zingt mit Irene t duet Zundagskind en Marianne van der Velde is as twijde stem te heuren in Laangzoam neergoan. Dij nummers binnen omtoalde teksten van d'Ierse zanger-laidschriever Glen Hansard (bie hom haiten de nummers Winning streak en Falling slowly).

 

t Grunneger woord 'kullen' betaikent zoveul as mishottjen of tegenvalen. De noam van band en cd zol zien betaiken hieraan ontlainen. k Wil nait de toalnazi uuthangen, mor is dat gain d/t-fout? Is t voltooid dailwoord van 'kullen' nait 'kuld'? Kin t den n vergrunnegste òflaaiden van t Engelse woord veur cultus wezen? Mainsttied het n cult gain grode schoare fans of populariteit bie n groot pebliek. Kinst dat zeggen van de Grunneger meziek, t binnen ja benoam Grunnegers dij der noar luustern. Mor wel n bult Grunnegers. Doaronder is der veurvast n braid pebliek veur de tougankelke meziek van Irene en heur band. d'Eerste vaar singles hebben bie RTV Noord in de Noord 9 stoan. Dat is al n schier riegje hits. Of t nou 'kuld' is of 'kult', t geldt hier zekerwoar nait. Sikkom is net nait, en net nait is … nait. Irene Wilkens & Sikkom Kult binnen dus bepoald nait mishottjet.


« 

Reactie plaatsen

Reacties

Er zijn geen reacties geplaatst.