Gewoon superfood

Gepubliceerd op 31 december 2018 16:53

Om nog aal Formule 1-races rechtstreeks zain te kinnen, mos k twij joar leden veur nood digitoale televizie nemen. As gevolg doarvan kreeg k vanzulf ook meer zenders woar niks biezunders op te zain is. Bie n verveeld rondje zappen kwam k op de Nederlandse kookzender 24 kitchen te lande, middenin n pergram van Jamie Oliver. Deur zien passie en enthousiasme, en de smoakelke menaaier woarop t aal in beeld brocht wuir, bin k derbie hangen bleven. Sunt den heb k sikkom aal zien pergrammen zain, smangs zulfs meerdere moalen.

Noa de daarde herhoalen van de riege Jamie's Super Food heb k mie mor es t biebeheurende kookbouk kocht, in de Nederlandse vertoalen Jamie's super food voor elke dag nuimd. In dit bouk uut 2015 geft de Britse tv-kok zien aigen kiek op t verschiensel superfood. Gezond wezen en joe goud vuilen begunt bie joen doagelks eten, doar binnen echt gain alternatieve diëten veur neudeg mit goji-bezzen, chia-zoad en aander hippe, duurbetoalde dingen van de drogist of reformwinkel. Mit de doagelkse boodschoppen dij je gewoon bie de supermaarkt hoalen kinnen, kom je al n hail ende. Deur t loos kombineren van inholten kin je lekkere en gezonde moaltieden moaken, woarmit je wat van aal belangrieke voudensstovven binnenkriegen.

 

In apaarde heufdstukken geft hai verschaaiden resepten veur ontbijt, lunch, diner, snacks en drinkerij. Elk resept is in heldere toal beschreven. Onderaan de bladzie staait n dudelk overzicht van t aantal kalorieën, de voudensweerden (vet, verzoadegde vetten, aaiwit, koolhydroaten, suker en vezels) en de tied dij je neudeg binnen om t te moaken. Voak binnen wel veul inholten neudeg veur ain gerecht. Bie elk gerecht staait n smoakelke foto, dij nuigt om t te moaken en te eten.

 

In de veurberaaidens op t bouk het Jamie Oliver n aantal steeën in de wereld bezöcht woar de gezondste en laangstlevende lu wonen: o.m. t Griekse aailand Ikaria, t Japanse aailand Okinawa en t schieraailand Nicoya in Costa Rica. In aal dij kontraainen bestaait t eetpetroon uut veul gruinte en fruit en waaineg vlais. Dat is den ook de boases veur de resepten in dit bouk. Hai geft ook uutleg woarom dat gruinte en fruit t beste uutgangspunt veur t eetpetroon binnen. Wieder gaait e in op t belang van koolhydroaten, zuvel, wotter drinken en verantwoord eten inkopen. n Goie nachtrust is ook belangriek bie n gezonde levensstiel. Doarom is der ook n parregroaf over sloapen en de invloud dij eten doarop het.

t Eerste resept dat k moaken loaten heb, was fagioli fusilli (wokkelpasta, zeg mor) mit praai, artisjok en lauriereulie. Doar heb ik nog weer mien aigen superfood-draai aan geven, deur pasta te bruken van kikkeraarten (telt dat ook as portie gruinte, mister Oliver?). Ik kin noamelk nait zo goud over gewone pasta, woar mainsttied waaite in zit. Dat kin zwoar wezen veur moage en daarms as je, zo as ik, n zittend leven hebben zunder liggoamsbewegen. Dij kennis heb k den weer uut n aander bouk.

Verschaaiden foodbloggers, recensenten en fans van Jamie Oliver waren (nait altied positief) verrast dat hai zoneudeg mitdoun mos aan de superfoodhype. Gounent vonden t n tegenvaler van de tv-chef dij eerst en veuraal vindt dat je genieten mouten van joen eten. Mor dat kin dus op n verantwoorde menaaier, zunder dat t onneudeg stoer en duur wordt. Mit de resepten uut Jamie's superfood voor elke dag as inspiroatsie is t meugelk om meer òfwizzeln en alternatieven in joen eetpetroon aan te brengen. Zo moak je joen gewone eterij tot superfood.


«   »

Reactie plaatsen

Reacties

Er zijn geen reacties geplaatst.