W Series helpt vraauwen in de racerij

Gepubliceerd op 2 mei 2019 16:23

Aankom zotterdag gaait de W Series van start, n raceklasse woar bloots vraauwelke coureurs aan dailnemen. t Is veur t eerst in de geschiedenis van de racerij dat zo'n klasse bestaait. Onder t motto 'Rethink racing' wil d'organisoatse de meugelkheden veur vraauwen vergroten om tot de hogere regionen van d'autosport deur te dringen. Vraauwen zollen op weg noar de top nog te voak tegen n gloazen plefon aan kommen, veurdat ze echt deurbreken kinnen. Nait deur n gebrek aan talent, mainsttied ligt t aan t uutblieven van (financiële) steun. De kampioene krigt n haalf miljoun dollar aan priezengeld, om heur te helpen de volgende stap te moaken. t Ultieme doul is om n vraauw in de Formule 1 te kriegen.

Veuruutlopend op de serie binnen de mainens nait alenneg mor positief. n Groot dail van de mannelke racefans nemt t nait serieus. Op facebook en autsportforums worden veul grappen moakt over bv. richtensgevuil en inparkeren. Ook seksistische opmaarkens richten de dailneemsters, t prehistorische 'de vraauw het mor ain recht en dat is t aanrecht' en zulfs #MeToo kommen veur. In de serieuze reaksies gaait t mainsttied over de vroag of vraauwen liggoamelk en/of mentoal staark genog binnen om op t högste nivo mit te doun.

Sommege vraauwelke coureurs zain der ook niks in. 'Wat n treurege dag veur d'autosport', schreef Pippa Mann op Twitter. Volgens de Britse coureur uut o.m. de IndyCars (6 starts in de Indy 500) kaizen meugelke geldschaiters derveur om vraauwelke racers te segregeren in stee van ze te steunen. 'Ik bin daip ontgoocheld om zo'n historische stap achteruut mit te moaken.' De jonge Duutse Formule 3-coureur Sophia Flörsch begript d'argumenten, mor kin zoch nait vinden in in d'oplözzen. 'Vraauwen binnen steun neudeg op de laange termien en betraauwboare sponsors.' Zai wil t gewoon opnemen tegen de besten in de sport. En op t heden binnen dat toch veuraal manlu.

Veul mannelke coureurs lieken gain uutgesproken mainen te hebben of kommen der nait veur uut.

17 van de 18 coureurs in de W Series 2019. Achteraan in t midden de Nederlandse Beitske Visser. (Foto: W Series)

Der waren 55 aanmeldens van vraauwen dij wel aan de W Series dailnemen wollen. In n vaardoagse selectieronde binnen dij uutgebraaid test op verschaaiden voardegheden: nait allenneg t rieden zulf, mor ook liggoamelke fithaid, mentoale bekwoamhaid, psychologische en psychometrische tests, communicatieve voardegheden enz. Doarnoa gingen 28 kandidoaten deur noar de twijde ronde, woarin o.m. de te bruken racewoagen test wuir. Uutendelk het t n startveld van achttien coureurs aanbrocht.

Doaronder de 24-joarege Nederlandse  Beitske Visser. Zai begunde as viefjoarege in karting en zit vanòf heur zeuventiende in d'autosport, veurnoamelk in ainzitters. In twij seizoenen ADAC Formel Masters won ze drij wedstrieden en wuir ze twij moal achtste in d'endstand van t kampioenschap. Doarnoa ree ze drij joar in de fysiek zwoare Formule V8 3.5, mit in twij races n viefde ploatse as beste rezeltoat. In de

GP3, n juniorklasse in t veurpergram van de Formule 1, het ze twij moal n race reden. As eerste vraauw wuir ze opnomen in t juniorenteam van Red Bull Racing, mor mos doar al gaauw weer vot, noa n  teleurstellend seizoen in de ADAC Formel Masters. Tot zowied het Visser 118 races reden, mit 7 overwinnens en nog 11 aander podiumploatsen.

De Britse Jamie Chadwick ree mit 11 joar veur t eerst op n kart en kwam op heur vieftiende in d'autosport te lande via de race-oplaaiden van de Ginetta Junior Championship. In 2015 won ze, mit heur mannelke teamgenoot Ross Gunn, de titel in de GT4-klasse van t British GT Championship. Mit 17 joar was ze nait allenneg d'eerste vraauw, mor ook de jongste rieder ooit dij kampioen wuir. Vleden joar was zai d'eerste vraauw dij in de Britse Formule 3 n race won. In de winter van 2018-2019 dee ze mit aan de MRF Challenge, woarin ze as eerste vraauw de titel won.

De mainst ervoaren coureur is Alice Powell, dij al 203 wedstrieden in verschaaiden klasses reden het, woarvan ze 23 won en in nog 49 op t podium ston. In 2010 wuir ze kampioen in de British Formula Renault Championship (BARC). In 2012 ree ze in de GP3 en was d'eerste vraauw dij doar punten scoorde. In 2014 won ze de AFR Series. Toun mos ze stoppen wegens gebrek aan financiële steun.

d'Organizoatsie van de W Series het officieel gain uutsloagen bekend moakt van de testdoagen. Volgens de wedstriedlaaiden ging t nait om snelle rondes, mor veul meer om t kennismoaken mit de woagen. Toch kwam via Twitter n foto noar boeten van de tiedwoarnemen, mit de tieden van ain dag. Doaruut bleek dat dizze drij vraauwlu bovenaan stonden, mit bloots de 18-joarege Spoanse Marta Garcia nog veur zoch. Meugelk geft dit toch aan dat zai de grootste kanshebbers op goie rezeltoaten binnen.

Coureurs as Pippa Mann en Sophia Flörsch willen tegen manlu racen en zoch nait in n apaarde raceklasse 'wegzetten' loaten. Stellen ze doarmit terecht dat de W Series onneudeg of zulfs onwìnselk is? Zo zol t wel wezen mouten. n Vraauw dij de volgende stap moakt, komt ja toch weer in dij mannenwereld te lande. De klasse kin vraauwelke coureurs wel zichtboarder moaken, woardeur ze as goud veurbeeld veur wichter dainen kinnen om ook coureur te worden. Zichtboarhaid moakt de riedsters vanzulf ook interessanter veur sponsoren. Veur de dailneemsters zulf mout t n ekstroa meugelkhaid wezen om kennis en ervoaren op te doun, as t meugelk is noast n klasse woarin ze t tegen mannelke tegenstanders opnemen mouten. t Beste is vanzulf dat gain apaarde raceklasse veur vraauwen neudeg is. De W Series mout veuraal bedould wezen om uut te vinden of - en zo joa, woar - vraauwen tekörtschaiten veur t moaken van n volgende stap in heur loopboan. As ze doarmit uutvinden wat veur vraauwen de juuste aanpak is om deur te steuten noar de top, is dat weerdevolle info om te dailen mit coureurs, trainers, teams en autosportbonden. De W Series is pas echt n sukses as ze zochzulf overbodeg wait te moaken.

De wedstrieden in de W Series vinden ploats rondom dij van de Deutsche Tourenwagen Masters. t Kampioenschap wordt verreden over zes races. Aankom zotterdag 4 maai is d'eerste, in Duutsland op t circuit van Hockenheim. De W Series dut ook t circuit van Azzen aan: de thuusrace van Beitske Visser is op 20 juli. Zai de klender en meer info op de webstee van de W Series. Tickets binnen verkriegboar via de webstee van de DTM. De wedstrieden worden in Nederland live uutzonden op Ziggo Racing. Op Ziggo Sport binnen loater soamenvattens te zain. De NOS brengt in de race-weekends t wiedere nijs in heur sportuutzendens.


«   »

Reactie plaatsen

Reacties

Er zijn geen reacties geplaatst.