Coureur Camille

Gepubliceerd op 24 mei 2018 19:48

In 1888 zörgde Bertha Benz veur de deurbroak van d'auto. Nait veul loater waren drij veuraanstoande Françaises d'eerste vraauwelke snelhaidsduvels. Anne de Rochechouart de Mortemart, hertogin van Uzès, haar in 1898 as eerste vraauw in Frankriek n riebewies. In 1899 kreeg zai as eerste vraauw n bekeuren veur te haard rieden: in t Bois de Boulogne ree ze 15 km/u, woar de limiet 12 km/u was. Barones Hélène van Zuylen ging in 1898 as eerste vraauw van start in n autorace: Peries-Amsterdam-Peries. In de race Peries-Berlien van 1901 mos zai op d'eerste dag opgeven deur n technisch perbleem. d'Aander dailnemende vraauw kwam wel aan de finish. Dat was Camille du Gast.

Camille du Gast in Peries-Berlien 1901 (foto: Wikimedia Commons)

Zai was mainstekaans d'eerste vraauw dij carriére moakt het in d'internationoale gemotoriseerde sport. Dizze Peries-Berlien was heur eerste Grand Épreuve. As 122e en leste ging ze van start, om as 33e binnen te kommen.In heur klasse, woagens boven 650 kg, was ze 29e. Heur 20 pk Panhard et Levassor was zekerwoar gain racewoagen, mor min of meer n standoard stroatauto.
 
Marie Marthe Camille Desinge du Gast wuir op 30 maai 1868 geboren in n rieke Periese femilie. As kind was ze kwoajongesachteg, mor as jonge vraauw gruide ze uut tot de schierste vraauw van Peries. Mit heur gruine ogen, blonde hoar en welgevörmde feguur, n ondeugend gevuil veur humor en n onweerstoanboare glimlaag kon ze op veul aandacht van manlu reken. Ze trok zoch niks aan van verwachtens hou n vraauw zoch gedroagen mos. Camille dee zuver wat zai wol, want 't leven was gewoon te saai veur vraauwen'. Heur traauwen mit Jules Crespin veraanderde doar niks aan. Hai peerdjede heur zulfs aan in ballonvoaren, schaiten, peerdesport en verschaaiden wintersporten.
 
In 1895 trok Camille peblieke belangstellen deur as eerste vraauw n parachutesprong te moaken. Vanòf n högte van 2000 vout sprong ze uut n haiteluchtballon, mit op heur parachute t logo van Dufayel, ain van de grootste woarenhuzen in Peries. Jules was doar direkteur en grootaandailholder. Om nait de suggestie te wekken dat heur doaden pure publiciteitsstunts waren veur heur man zien zoaken, bruukde Camille heur wichternoam, en bleef dat doun in heur wiedere sportieve leven.
 
Jules kwam in 1896 uut tied, nog mor 27 joar old. Camille was nou n jonge wedevraauw, mor wel aine mit veul geld. Ook de dood van heur man veraanderde niks aan heur menaaier van leven. Zie was veul aan de raaize,  ging baargbeklimmen en trok allenneg op n peerd deur Marokko. Heur passie veur autoracen ontston meugelk deur n affaire mit James Gordon Bennett, dij heur de grootste sportvraauw aler tieden nuimde.
 
Ze leerde autorieden in 1898 en wuir de twijde Franse vraauw mit n riebewies. Ze haar n Panhard en n Peugeot, meugelk de auto's dij van Jules west waren. Noa t zain van de start van de race Peries-Lyon in 1900 was ze vastbesloten om zulf aan t racen te goan. In juni 1901 ston ze dus aan de start van Peries-Berlien, mit Hélie de Talleyrand-Périgord, hertog van Sagan, as monteur. Net as Camille was hai n bekende in de Periese society. Zai waren goie vrunden en meschain ook gelaifden.In de wegrace over 1105 km, verreden in drij etappes, ree de Panhard et Levassor probleemloos en was der onderwegens vrij waaineg tegenslag. In 1901 wuir nog nait veul aan autosport doan en Peries-Berlien was dat joar heur ainegste wedstried. Zie liekt nait mitdoan te hebben aan heuvelklimmen en  snelhaidsproeven dij in Europa opkwamen.
 
Camille heur activiteiten in 1902 binnen nait haldaal zeker; ze zol mitdoan hebben aan Peries-Wenen, mor liekt nait op dailnemersliesten te stoan. Meugelk was heur inschrieven òfwezen. Dat was wel zo bie New York-San Francisco. d'Opbluiende autosportautoriteiten in de Verainde Stoaten waren nooit gecharmeerd van vraauwelke bestuurders. Camille zol n groot dail van t joar besteed hebben aan n laange rondrit, al is de bestemmen nait bekend. Zeker is wel dat ze tied kwiet was aan t zuvern van heur noam in de Franse rechtbanken, noa claims dat zai t model was veur t schilderij La Femme au Masque van Henri Gervex uut 1885. Doarop staait n  op Camille liekende vraauw dij n Venetioans gebèlschop dragt, mor wieder noakend is. d'Aankloagers bleken femilieleden te wezen. t Was n slepende zoak, ondanks dat Gervex en t echte model, Marie Renard, genog bewies leverden.
 
In 1903 ging Camille endelk weer van start in n Grand Épreuve. In Peries-Madrid nam ze dail as febrieksrieder in n 30 pk De Dietrich. Start as 29e, was ze opklommen noar de 8e ploatse,  toun zai stopde om heur Engelse teamgenoot Phil Stead te helpen, dij noa n ongeluk klem zat onder zien woagen. Bie heur deurkomst in Bordeaux lag ze 77e. Wieder verbetern kon ze zoch nait meer, der waren zoveul ongelukken gebeurd mit doden onder coureurs en toukiekers, dat de wedstried òfbroken wuir.

 

Veur 1904 kreeg Camille t aanbod om veur t febrieksteam van Benz te rieden. Doar is niks van kommen, want vraauwen wuiren uutsloten van competitie deur de Automobile Club de France. De male publiciteit rond de dodenrace Peries-Madrid was n gelegenhaidsekskuus: de peblieke verontwoardegen zol veul te groot wezen as n vraauwelke coureur om t leven kwam. De mannenclub ACF wol de toukomst van d'autosport beschaarmen, mor ook gewoon de vraauw heur stee wiezen ... De reden veur de ban was 'vraauwelke tiepelzinneghaid'. Noa t abrupte ende van heur carrière op vaar roaden ging Camille racen mit motorboten, benoam in Frankriek. Heur striedlust in de bootrace Touloux-Algiers van 1904 brocht heur in Frankriek de bienoam l'Amazone aan.
 
Noa heur òfschaaid van de snelhaidssporten, was Camille peerdentrainer, gaf ze pianorecitals en richtde ze n organisoatsie op tegen
daaiernleed. In Frankriek en Noord-Oafrikoa stichtde ze laifdoadeghaidsfondsen veur gezondhaidszörg aan aarme vraauwen en kinder. Ze was lid van de vrouge feministisch bewegen, woarmit ze campagne voerde veur stemrecht en gelieke rechten.
 
In 1910 wuir Camille sikkom slachtovver van n roofmoord in heur huus. Mit heur kenmaarkende moud en vechtlust wos ze d'overvalers, woaronder heur aigen dochter, te verjoagen. t Was n traumatische ervoaren dij heur veurgoud veraanderd het. Ze besloot de rest van heur leven bloots nog in t taiken te stellen van de zörg veur daaiern. Zo ging ze waarken in de Periese opvang veur zwaarfhonden en gewonde honden dij in 1903 opricht was deur Gordon Bennett. In 1927 het Camille mit heur aigen geld n daaiernasiel in Gennevilliers moderniseerd en uutbraaid.
 
Camille du Gast kwam uut tied in 1942. Ze ligt begroaven in t femiliegraf van de Crespins op de begroafploatse Pere Lachaise in Peries. In 1929 het de Franse overhaid heur eerd deur n stroade noar heur te vernuimen: de Rue Crespin du Gast in t Periese district Menilmontant. Heur noam is ook verbonden aan n technische schoule, de Lycee des metiers Camille du Gast in Chalon-sur-Saône. Op t heden wordt ze in Frankriek benoam herinnerd om heur laifdoadeghaid, mor heur sportieve doaden worden zekerwoar ook nog altied erkend.

«   »

Reactie plaatsen

Reacties

Er zijn geen reacties geplaatst.