Wat Aans! geft goie hoop

Gepubliceerd op 15 juli 2020 om 16:57

De manlu van Wat Aans! leken van dij nijmoodse artiesten dij heur meziek bloots via digitoale wegen bie de luusteroar brochten. Hail in t begun was der t album Aans Wat!, dij allenneg mor van heur webstee download worden kon. In de volgende tien joar verschenen heur nije singles as videoclips op YouTube en loater wuiren ook dainsten as Spotify bruukt. Nou hebben ze mit Grunnegs Hoop toch n fysiek album uutbrocht, mor toch net even aans: t album komt nait op cd of vinyl, mor in t deusie van n kassettebaandje. Doar bliekt den weer n usb-stick in te zitten.

 

Zo as we t wend binnen van FiezeRik en De Beunhoas, bevatten de mainste nummers de neudege humor, mor sommege nummers binnen wat serieuzer van toon. Veur t album aan was Roelfina al uutbrocht as eerste single. t Gaait over n verbroken reloatsie of n laifde dij nooit van baaide kanten kommen is. Was zai n goldgroaver of haar hai n obsessieve laifde veur heur? Doar kin je joen aigen invullen aan geven. t Is wel zo dat hai de buutsen nou leeg het. De daarde single Grunnegs Hoop is vleden joar september uutbrocht en kwam votdoadelk op de twijde ploatse binnen in de Noord 9. Dizze soamenwaarken mit Wia Buze begunt nait as hiphopnummer. Wia rapt vanzulf ook nait, mor heur melodieuze inbreng kontrasteert en kombineert goud mit de fanatieke rap en de koorzang (n meersporege opnoame van de rappers zulf en heur producer Jeroen Russchen). Der zit n dudelke bosschop in: wie Grunnegers mouten grootser wezen op onszulf en huiven ons nait onder t mous stoppen loaten.

 

Doar tussenin verscheen, ook nog net veur t album aan, Ik bin n G. Muzikoal liekt t nummer op G-Funk, n stromen in d'Amerikoanse hiphop van de joaren 1990. In dij meziekstiel staait de G veur gangster. Wie binnen vanzulf nait van dat criminele volk, dus is t bie ons gewoon de G van Grunneger: 'gain eelske blèrbek, mor gewoon n nuchtere'. Dou mor gewoon. Schaande genog zain veul westerlingen ons as apaarten en beantwoorden gounent dat beeld ook nog. In 2009 ruip weekblad Elsevier de gemainte Pekel uut tot de Slechtste Plek van Nederland. Doarnoa het de webstee GeenStijl n verslag moakt dij, bewust, niks venbeterd het aan t imago van Pekel. In dat filmpie zit Adriaan Kleve Grunnegs te proaten tegen Rutger Castricum. Kleve zien Woaromdatten!? is bie Wat Aans n gevleugelde uutsproak worden, woar ze ooit nog eswat mit doun mozzen. Ze hebben de gugel mit t onneuzele filmpie, deur op n poar uutsproaken in te hoaken mit n tekst dij aiglieks naargens over gaait.

 

Twaalf joar leden luit Wat Aans! veur t eerst van zoch heuren mit nummers as Haalf stront, haalf regenwotter en Woisjawel! (schunneg in t Grunnegs). Sunt dij tied binnen ze muzikoal en tekstueel gruid, mor der is altied ruumte bleven veur dubbelzinnegheden en teksten dij over draank, poedies en seks goan. Dat aine moment zol over seks goan kinnen, mor as je goud luustern, heur je dat t gaait over bier. In Bokkie gaait t den wel over seks, n beetje mit n knipoog noar vrouger, toun 'waren wie knienen, joa dat waren nog es tieden'.

 

In de mainste nummers binnen de manlu mit zien twijen te heuren, mor ze hebben ook solonummers. In De Beunhoas zienent gaait t over zien faveriete Grunneger snack, Metworst. Hier is t ook weer: dou mor gewoon, gain sjompagne of genoatenkroketten. Hai kin nait zunder metworst, mor t mout wel n vrizze worst wezen. In FiezeRik zien Repperdepep klinkt kritiek op de Grunneger meziek: 'ze binnen nait uniek, want de mainste Grunnegers moaken begroafenismeziek'. Zo slim is t ook nait, mor veul Grunneger meziek sprekt t jonkvolk nait aan en ze vinden dat t aal op nander liekt. Mor wèl zörgt derveur dat de jeugd nog Grunnegs heurt? Dat is Wat Aans! En dat is gain grootsproak van de mit òfstand best bekeken Grunneger artiesten op YouTube: ze hebben sikkom 7000 abonnees en n aantal clips dij honderddoezenden moalen bekeken binnen.

 

As je op Spotify luustern noar Grunnegs Hoop, krieg je aacht nummers te heuren. Op de usb-stick stoan ook nog vaar singles dij in de drij joar doarveur op YouTube verschenen binnen: Trilploat, Sjomp, Batterij en Dik Doun. Van dij twaalf nummers binnen nait minder as zèzze n nummer 1-hit worden in de Noord 9 bie RTV Noord. Grunnegs Hoop mag dus n woar hitalbum nuimd worden.

 

Hoop dut leven, wordt voak zegd. Grunnegs Hoop is n album woar meziek op staait dij bie de Grunneger jeugd aankomt, mor nait per se n oldere generoatsie òfschrikt. De Grunneger toal is leventeg en dat mout je laankdureg zo holden willen. Doarveur mout je t jonkvolk dermit in aanroaken brengen en holden. En wat is nou n betere menaaier as mit meziek? Mit de meziek dij Wat Aans! moakt, is der goie hoop dat t mit de toukomst van t Grunnegs nog wel n haile zet goud zit.


«   »

Reactie plaatsen

Reacties

Er zijn geen reacties geplaatst.