Sound van Sodom

Gepubliceerd op 12 november 2019 19:38

Alex Luttjeboer is al vatteg joar aan d'loop in de meziek. Dat was altied mit Engelstoaleg repertoire. Aan zingen in t Grunnegs haar e nog nooit docht. Tot twij joar leden, toun hai mit zien band Alex Julius & The Chaplains bie Radio Noord te gast was in Café Martini om n nije Engelstoalege single te promoten. Prezentoator Eric Bats doagde hom uut om es n nummer in t Grunnegs op te nemen. Luttjeboer nam t eerst nait serieus, mor haar al gaauw de tekst veur n eerste single op pepier.

 

Funky vouten was votdoadelk n sukses: t laid ston bie Radio Noord 15 weken in de Noord 9 en kreeg n 2e ploatse as högste noteren. Nog vaar singles volgden, dij ook aal in de hitlieste van Radio Noord kommen binnen. Siepeltjevlaais ston zulfs op nummer 1. Boetendes wuir de Bosklopper Bokoal aan ze uutlangd veur t Leed is leden, as beste Grunnegstoalege single van 2018. Mit de overstap op t Grunnegs is de bandnoam veraanderd in Nulviefteg. En nou is der de cd Heur es ... Noast de vief singles dij al uutbrocht waren, stoan doar nog vief nije nummers op.

 

Muzikoal is der aiglieks niks veraanderd: Nulviefteg is gewoon de Grunnegstoalege veurtzetten van The Chaplains, dus n pop-/rockband dij mit verschaaiden meziekstielen uut de vouten kin. Ze nuimen t zulf wel n omgevalen ploatenkaaste. Zo binnen der invlouden te heuren van rock en blues. Funky vouten kon wel es d'eerste funkploade in t Grunnegs wezen. Wieder heuren we reggae, soul en het de nije single Liflafjes n jazzy inslag. In de mainste nummers wordt muzikoal goud uutpakt, mor t leste nummer Voader & zeun is n akoestische ballad.

 

Verschaaiden artiesten en bands - nait altied de besten - vuilden de noodzoak n laid op te nemen over d`eerdbevens en de gaswinnen in Grunnen. Mit t Leed is leden het Nulviefteg doar aine van de staarkste nummers over moakt. Alex Luttjeboer zugt in zien doagelks waark as stukadoor de schoade dij lu aan heur huzen hebben. Zukse schoade kin hersteld worden. 'Meer kin k ook nait doun / mor k wil der wel wezen / om lu bie te stoan / terwiel t leed allaank is leden'. Vanuut n aigen ervoaren kin hai dus vertellen hou de zoaken derveur stoan. t Is n staarke en overtugende tekst in n krachteg nummer. t Laid het zien hitpotentie woarmoakt deur acht weken in de Noord 9 te verblieven en terecht mit De Bosklopper Bokoal bekroond te worden. As je n bosschop overbrengen willen, mout je t mit zo'n laid doun, dat het de band goud begrepen.

 

Mor t binnen nait allenneg serieuze teksten, in veul nummers zit (zulfreloativerende) humor. Magst ook ja wel n moal lagen om meziek. In Funky vouten zingt Alex dat hai nait daanzen kin. Siepeltjevlaais gaait over n vent dij t nait goud dut bie de vraauwlu, benoam omreden dat e zo'n moekesjonkie is. In Liflafjes wordt de droak stoken mit Grunneger 'boerenvreters' dij niks hebben mouten van dij nijmoodse eterij van tegenwoordeg,

 

Luttjeboer is n echte Winschoter. Dat heurst in zien toal. Veur de Twijde Wereldoorlog haar Winschoot n vrij grode Jeudse gemainschop. Doardeur bevat t Winschoter Grunnegs veul Jiddische en Bargoense (dat veul aan t Jiddisch ontlaint) woorden. Dij toal zel bie leutjen aan verdwienen, mor Luttjeboer pebaaiert t nog n beetje in ere te holden. In Siepeltjevlaais gaait t over 'n ainzaalm van n vent', wat n biezunder of roar persoon is. In meer nummers zitten woorden dij n manspersoon aanduden, zo as 'binke' en 'boogerd'. Bepoalde woorden worden nog wel es in aander dailen van (Oost-)Grunnen zegd. n Woord as 'poter' (vot, verdwenen) bruuk ik as Veenkelonioal ook en 'ik heb siezen in de buutse' (senten, geld) heur k ook wel es boeten Winschoot. Mor bepoalde woorden binnen zó ploatsgebonden dat ze zulfs nait in t Grunneger woordenbouk van Ter Laan veurkommen.

 

Alex Luttjeboer zit al vatteg joar in de meziek en het in meerdere bands speuld. Hai is onderdail van de sound van Sodom. Zien aigen toal verstaarkt dat geluud en brengt t bie n nij pebliek.  Mit Heur es ... is de verschaaidenhaid aan meziekstielen in ons streektoal weer n beetje groter worden. Doarmit is Nulviefteg n verrieken van de Grunneger meziek.


« 

Reactie plaatsen

Reacties

Henk Puister
een maand geleden

Mooie bespreken, Bert, van Nul Viefteg. Woorden as 'poter' (verdwenen) en 'siezen' (geld) binnen mie as geboren Sapmeester hail bekend.