De Groot het niks te kloagen

Gepubliceerd op 21 maart 2020 om 16:45

De wolf is gewoonlek n groepsdaaier, mor gaait ook wel es allenneg op oaventuur. Vleden joar het Jan Henk de Groot de Troebadoers-roedel verloaten om zien daarde solo-album De wolf is trug op te nemen. Veur de gelieknoamege theoatertoer is hai ook allenneg bie t pad . Op zien trektocht deur t Grunneger theoaterlandschop (en zulfs doarboeten) kwam hai op zotterdag 7 meert in mien stamtheoater vanBeresteyn in Veendam.

 

t Was gain uutverkocht huus. Aiglieks zunde, want de beste Grunneger artiesten - woar De Groot zekerwoar aine van is - verdainen n groot pebliek. Mor van dij nood hebben ze bie vanBeresteyn n deugd moakt. De veurste riegen stoulen haren ze vothoald, zodat t optreden zoch veur t podium op de vlakke vlouer òfspeulen kon, op goud n meter òfstand van pebliek. Dat zörgde veur n intieme sfeer, wat t persoonleke kerakter van zien laidjes en verhoalen meschain nog wel beter uutkommen luit. Biekommend veurdail veur mie was dat ik eerste rang zat.

 

Hai gaait mit zien cd verschaaiden muzikoale richtens op, mit invlouden van o.m. blues, folk, country en rock. Up-tempo nummers worden òfwizzeld mit gevuilvolle, intieme ballads. In de studio van Harmen Ridderbos (Town Of Saints) en mit n ploug goie muzikanten is van  De wolf is trug n kwalitatief staark album moakt. Ook in n akoestische setting kin JH dizze veulziedeghaid en kwaliteit vastholden. Zochzolf begelaaidend op gitaren, vleugel en ukelele en tussen de laidjes deur persoonleke verhoalen vertellend, boeit e van begun tot ende.

 

Jan Henk de Groot het niks te kloagen, of toch wel? Dik n joar leden leek t nait zo goud te goan mit zien gezondhaid. Doar vertelt hai over in de veurstèllen. Doar was Jacques J. d'Ancona nogal kritisch over. Dij schreef in oktober, noa de première van De wolf ... in Delfziel, dat je joen pebliek nait lasteg valen mouten mit medische problematiek. Doar was op dizze oavend in Veendam gain sproake van. En woarom ook, De Groot zel zulf gain verlet hebben van n twij uur durende kloagzang, want t leven bestaait uut meer as liggoamelk ongemak (neem dat mor van ondergetaikende aan). Zien toustand bleek uutendelk tou te valen, mor t was veur hom wel n taiken dat e zien leven drastisch omgooien mos. Hai is gezonder leven goan o.m. deur fanatiek aan t haardlopen te goan. In t laid Stap veur stap vertelt hai dit verhoal op n luchtege menaaier. t Ligt veur d'haand dat dit n up-tempo nummer worden is. Op de cd gaait t zulfs in de richten van folk-rock.

 

In t leven mout je ook genog tied veur joezulf nemen, den kin je wel es n vrizze kiek op de zoaken kriegen. In Zin aan let hai de boudel even zo as t is om n weekje noar Schier te goan. t Is nait per se n sukses, hai wordt zulfs 'muid van ale rust'. Gelukkeg krigt de muzikant in hom weer de neudege inspiroatsie. JH geft meer inkiekjes in t leven van n muzikant: zo zingt hai dat e zoch n Nije gitaar kocht het (hai het ook ja mor n poar ... toch?). In Spiekerboor dut hai t reloas over hou hai n suksesvolle Grunneger artiest worden is. Net as bie d'Amerikoanse blueslegende Robert Johnson het de duvel zien pad kruusd. De crossroads lag in dit geval bie Café ‘t Keerpunt in t Drìntse dörp.

 

Mit de nostalgie van n vatteger vertelt en bezingt ook veul persoonleke verhoalen uut zien jeugd. In 101 dalmatiners gaait t over Bobo, de hond woar de leutje Jan Henk te vroug òfschaaid van nemen mos. 'Bobo was B.A. / Mor zulfs The A-Team kon niks doun dou ze van dokter n spoitje kreeg'. t Nummer Satelliet gaait over zien jeugdege fantasie om t eerdse bestoan te ontvluchten. Meschain nemt Han Solo uut de film Star Wars hom wel mit in de Millennium Falcon. In dizze meer intieme setting zol je nait verwachten dat d'elektrische gitaar op batterij komt, mor toch staait de rocker in JH ook even op. Hai bezingt zien verkerentjederij mit n wichtje dij fan was van The Cure. Zai von dat hai sprekend leek op Robert Smith, zanger van de Britse band. t Nummer bevat tekstuele verwiezens noar t repertoire van The Cure.

 

t Laid Oma siepelsjuu, ain van zien nummers op de Troebadoers-cd Onbekìnde Wegen, verbindt de jeugdherinnerns mit de tegenwoordege tied. De jongste generoatsie krigt hier aandacht mit n laid over zien dochter Myrthe, dij veur t eerst allenneg Noar Stad gaait.

 

De wolf komt veur in sprookjes en mythologische verhoalen, dij de fantasie aanspreken en voak n levensles bevatten. Jan Henk de Groot het zien aigen wieze lezzen mit ons daild en ons smangs mitnomen in zien fantasie. t Leven zit vol verhoalen dij verteld worden mouten. Dat is t grotere idee achter De wolf is trug en dat is woar JH, as Troebadoer of ainzoame wolf, goud in is.

 

Jan Henk de Groot het niks te kloagen. Hai het meer zin in t leven en is muzikoal goud aan d'loop. De cd De wolf is trug het hom positieve kritieken aanbrocht, o.m. van Radio 1-prezentoator Frits Spits. Mit de biebeheurende veurstellen het JH ook weer es zain loaten dat e bie de beste zanger-laidschrievers in de Nedersaksische streektoal heurt. t Veendammer pebliek haar dus ook gain reden tot kloagen.


«   »

Reactie plaatsen

Reacties

Er zijn geen reacties geplaatst.