Gezelleghaid mit Henk Puister

Gepubliceerd op 30 september 2020 om 19:55

Henk Puister is ain van de bekendste schrievers in de Grunneger literoatuur. In verschaaiden bouken, bundels en bloumlezens is waark van hom te vinden. Hai was dik 30 joar n vaste gast in t streektoalpergram Toezeboudel op lokoale omroupen. Ook as je gain Grunneger bouken of tiedschriften lezen en zien noam nait kennen, heur je vervast wel es teksten van hom. Veul (streektoal)artiesten as Wia Buze, Gerard Schoonebeek, de Askay Brothers en de jonge zanger Krzysztof Groen zingen nummers woarvan hai de tekstschriever is.

 

Al vanòf t begun van de joaren tachteg is Puister aan d'loop mit t schrieven van gedichten en verhoalen in t Grunnegs en in t Nederlands. Zo'n aktieve en produktieve schriever het meer as genog waark (eerder veul te veul) om n oavendvullende veurstèllen mit te moaken. Dat mos lesten zotterdag mor es wezen, in theoater Van Beresteyn in Veendam. n Klaainschoalege opzet in de Jonckherenzoal zörgde veur n sfeer van 'gezelleg onder mekoar' bie Laangeleegte, Veenkade En Weer Thuus, woarin hai n inkiek in zochzulf geft, mor ook veul oog veur zien medemìns het.

 

Bie de Laangeleegte denkt elkenaine votdoadelk aan BV Veendam, de voetbalclub woar Henk meer as 40 joar traauw supporter van west het. Veenkade is de noam van t revalidoatsiesentrom in Veendam, woar hai n poar weken touholden mos noa n huusholdelk ongeluk en n opnoame in t braandwondensentrom van t Metini zaikenhuus. Thuus is zien geboorte- en woonstee Sapmeer. t Binnen zomor wat steeën dij veur de neudege belevenizzen en herinnerns en doarmit veur inspiroatsie zörgd hebben om te schrieven. Mor verlet van inspiroatsie is der aiglieks nooit veur n schriever as Henk Puister, schrieven is gewoon n noodzoak of n twijde noatuur.

 

Henk druig old en nij waark veur uut zien rieke arsenoal aan verhoalen en gedichten. Hai haar ook wat van zien laidteksten uutkozen. Nait om te zingen, doar mos e noar aigen zeggen mor nait aan begunnen. Mor veurdroagen het vanzulf as veurdail dat je nog wat beter noar n tekst luustern goan. Mainsttied wordt t op n luchtege en voak humoristische menaaier brocht, mor der is ook stee veur de gevuilege noot. Hai nam ons ook mit noar t begun van zien schrieversloopboan, woar t luchtege ook al d'overhaand haar bie t schrieven van slagzinnen en körde humoristische gedichtjes.

 

Alhouwel dizze oavend benoam om de schriever draaide, ston hai der nait allenneg veur. Hai haar twij gasten nuigd om wat biedroagen te doun. Henk zien bruier Bé las wat schetsen veur over de zaikte en leste levensfoase van heur voader Wessel. Dizze körde stukkies het Bé optaikend in t bouk Weerom Noar Vrouger, dij de bruiers mit heur baaident schreven. Henk druig nog n verhoal veur over n interview dij hai mit pa Puister haar in de veurberaaiden op dat bouk. Uut t verhoal over pa zien eerste motorfietse bliekt dat de zeuns t smuie proaten en t verhoalen vertellen van senior aarfd hebben. Veur n muzikoale biedroage zörgde Henk zien goie vrundin Joyce Bodewes. Zai schrift ook wel es in t Grunnegs en won al es n pries bie n schriefwedstried mit n verhoal over tied dat zai as kind uut Nederlands Indië noar Nederland kwam. Mor Joyce is meer aan d'loop mit zingerij. Zai zong o.m. twij laidjes dij ze zulf in t Grunnegs omtoald het: Streel De Strikkies Uut Mien Hoar (Take The Ribbons From My Hair) en Vogelvlucht (Bird On A Wire). Op Henk zien verzuik zong ze Arm Den Haag, oorspronkelk schreven deur Willem Wilmink veur Wieteke van Dort, woar vanzulf ook Joyce heur Indische achtergrond uut bliekt.

 

Noast n goie schriever is Henk Puister ook n beeldend verteller. Ik bin nait recht n beelddenker, mor zo as hai t wait te brengen, kin zulfs ik t nog leventeg veur mie zain. As schriever mout je dat ook kinnen om der veur joen touheurders n schiere oavend van te moaken. Zo binnen twijmoal drij ketaaier gaauw omgoan. De tied vlugt as je joe vernuvern, doar zörgt n onderholdende schriever as Henk Puister wel veur.


« 

Reactie plaatsen

Reacties

Er zijn geen reacties geplaatst.