As k der over noadenk is de nije single van Fries Wolma & Hennie Dolsma
16 jannewoarie 2023
Mit hail veul tröts prezenteert Fries Wolma zien nije single: As k Der Over Noadenk, n duet dat e soam mit ‘soulsister’ Hennie Dolsma zingt. As k Der Over Noadenk is òfkomsteg van Wolma zien Grunneger debuutalbum Kinder Van De Zun, dij op 29 maai 2022 prezenteerd is. Eerdoags is t laidje te beluustern op aal bekende digitoale platförms (Spotify enz.).
Fieke Gosselaar nije streektoalconsulent bie t CGTC
12 jannewoarie 2023
Fieke Gosselaar start 1 feberwoarie as streektoalconsulent bie t Centrum Groninger Taal & Cultuur. As schriefster is Fieke n bekende stem in d’hedendoagse Grunnegse literoatuur. Ze gaait zoch twij doage in de weke bezegholden mit t Grunnegs in de braidste zin: as schrieftoal, as proattaal en as onderdail van de Grunneger kultuur en identiteit. Ook zel ze in soamenwaarken mit kellegoa’s o.m. waarken aan verschaaiden leerprejekten en evenemìnten. Hierbie zellen ook de waitenschoppelke aktiviteiten van t CGTC n belangrieke rol speulen.
Fieke Gosselaar, opgruid in Finnerwold, debuteerde mit de verhoalenbundel Tussen de anderen. In 2018 verscheen heur eerste roman Het land houdt van stilte en vleden joar kwam de roman Als je ze kent uut. Heur (Nederlandstoalege) romans speulen zoch mainsttied òf in de pervinzie. Noast romans schrift Fieke gedichten in t Grunnegs en ze las joarenlaank Grunnegstoalege columns veur op Radio Noord. Fieke publiceerde o.m. in bloumlezens van Dichters in de Prinsentuin, Dag van de Grunneger Toal, t online literaire platförm Oader en in de bundel Verrassend Nedersaksisch. Ook verscheen heur waark regelmoateg in t Grunneger literair tiedschrift Krödde.
Alhouwel in heur kindertied thuus gain Grunnegs proat wuir, leerde Fieke wel degelk Grunnegs op de voetbalclub BNC in Finnerwold, woar elkenaine Grunnegs pruit. t Was dichter Jan Glas dij Fieke loater aanpeerdjede om ook in t Grunnegs te schrieven. Dat dee ze en de laifde veur de streektoal is bleven. ‘De toal heurt bie woarst vandoan komst en houwel t aantal mìnsen dat t Grunnegs sprekt vermindert, heb ik d’indruk dat d’interesse in streektoal der wel degelk is. Noast de leerprejekten dij der vanoet t CGTC op de schoulen lopen en d’ontwikkeln van apps om t Grunnegs online te kinnen leren, hoop ik de kommende tied bie meer mìnsen de laifde veur de streektoal aan te wakkern. Ze ontdekken meschain dat de streektoal heur meer kin brengen din ze haren vermoud.’
Meer waiten over Fieke Gosselaar? Veur de rebriek Moi Grunnegers! ging t CGTC in gesprek mit Fieke. Lees hier t interview: Moi Grunnegers!: Een gesprek met Fieke Gosselaar | CGTC
(Wèlle: Centrum Groninger Taal & Cultuur)
Niek Berendsen het Grunneger kookbouk prezenteerd
21 november 2022
Lesten zotterdag het de jonge Troapelder Niek Berendsen (geb. 1990 in Taiwan) n Grunneger kookbouk prezenteerd: Achter de Koezen is n bouk dat joe mitnemt op n culinaire en culturele raaize deur Noord-Nederland en de verschaaidenhaid van de Grunneger keuken deur t joar hìn beleven dut. t Bouk bevat veul resepten, verhoalen en foto’s! Achter de Koezen is vanòf nou verkriegboar via de boukhandel of de webstee van uutgeverij Profiel: https://www.profiel.nl/product/achter-de-koezen/.
Achter de Koezen
Niek Berendsen
2022
Hardcover
240 bladzieden
ISBN 9789052946177
Uitgeverij Profiel
€ 35,-
Wat Aans! & Burdy binnen Miljonair
25 juni 2022
As t aankomt op streams den binnen Wat Aans! en Burdy ondertied Miljonair. t Nummer Trilploat van Wat Aans! was t eerste Grunnegstoalege nummer mit meer as 1 miljoun streams op Spotify. In tied is dij koppositie overnomen deur Mit mien ogen dicht van Burdy. Om dit op n ludieke wieze te vieren, is der nou de nije single: Wat Aans! & Burdy – Miljonair
n Soamenwaarken tussen Wat Aans! en Burdy ston al laanger op de planning. Doar was allenneg wel n goud idee voor neudeg. Dou Burdy zochzulf gekscherend Miljonair nuimde, dou vuil t kwartje. Dit is t themoa wat verbindt, mor dit is ook n thema woar je goud mit oetpakken kinnen. Dit zörgde uutendelk veur t ontstoan van t nummer Miljonair.
Zowel Wat Aans! as Burdy binnen al joaren groag gezaine acts bie verschaaiden evenemìnten. Doarom is Miljonair nait allenneg geschikt veur de feesttìnde, mor zörgt t op elk stee veur n feesssie. t Nummer is vanòf nou te streamen via ale streamingdiensten en de videoclip is te zain op YouTube.
Bekiek Miljonair op YouTube: https://youtu.be/PNVg7LBDOhc
