SKV

Wie Grunnegers hebben de noam lu van waaineg woorden te wezen. Dat mag ook best uut t waark van Grunneger schrievers blieken. De Grunneger schrieverij laint zoch meroakel veur t SKV (Slim Kört Verhoaltje). Dit verschiensel is bie ons introduceerd deur onderwiezeres en veurmoaleg streektoalvraauw Ingeborg Nienhuis, noar veurbeeld van de Nederlandse schriever/columnist A.L. Snijders zien ZKV (Zeer Kort Verhaal). d'Uutdoagen van t SKV is om n kompleet verhoal te vertellen in minder as 100 woorden. Bie t tiedschrift Kreuze is stee veur schrievers om heur SKV te publiceren. Ik schrief ook wel es n SKV, de vief nijsten binnen hieronder te lezen.


Bratwurst

 

'NEIN, NEIN, NEIN!' Adolf ontploft. 'Kein Bratwurst, heb ik zegd! Joe waiten dat ik vegetoariër bin! Wèl het dat bestèld?!'

Gainaine zegt wat.

'Goud, k zel mild wezen. Dij t nou eerlek zegt, mag zulf zien waarkkamp uutkaizen.' Zien kaalmere toon paast nait bie Adolf zien roodvergrèlde kop.

Frau Junge lopt binnen. 'Herr Führer, hier is n telegram van Wi...'

'Geef hier!' Adolf rit heur t pepier uut d'haand en leest: 'Dear Adolf … wie waiten dastoe vegetoariër bist … enjoy your Bratwurst … mostderookmosterdop? … Winston.'

Der wordt grinnikt.

'Laag nait! Joe hebben mie veur t zootje! Sodemieter op, aalmoal! RAUS!!!'


Doen op de moan

 

Vanòf d'Eemshoavenweg zagst ons raket al stoan op Huizinge International Space Center. Op t lanceerplatförm ston n tankwoagen mit reketbrandstof. Ston doar Hooghoudt op ...?

De lanceren, de vlucht en t landen gingen aal goud. d'Eerste Grunneger moanmissie was sloagd. t Delezetten van t gruin-rood-wit-blaauw hevve vierd mit reketbrandstof, dat was gewoon schiere jannever. En smuik noar meer ...

Mor nou: 'Hoezen, we have a problem!' De tank is sikkom leeg, wie kinnen nait weerom. Elke moal dat d'eerde opkomt, kin ons leste wezen. Nog ain slok, den. Op n meugelke heldenstoatus in Grunnen. Mor dat zelve nooit waiten.

 

(Noar t gelieknoamege laid van Bert Hadders)


Google vertoalt

 

Mainst dat ik gain toalgevuil heb? Kom nou, ik bin Google, k bin wel n beetje loos! Dialekten heb k nait leerd, mor k begriep der wel wat van. Lestdoags mos k wat veur aine vertoalen, dat dou k mit Google Translate. Hai koos veur vertoalen van Nederlands noar Duuts, mor mieterde der n Grunneger tekst in. d'Echte stoere woorden wos ik nait (doar hebben joe toch n aigen woordenbouk veur?), mor wieder kon k mie der oardeg schier mit redden. Hai mos vervast nog wat verbetern, mor k heb hom toch mor even d'helfte van zien waark bespoard.


Hongersnood

 

Wat heb ik toch n honger. k Heb al doagen niks eten, k heb toch zo'n zin aan petat. En wat der loos is in de mìnsenwereld? Eerder was de stad der vol mit, mor nou lopt der sikkom gainent. En zo is der ja gain petat veur ons. Zai snappen toch wel dat doeven ook eten mouten? k Heb toch zo'n zin aan petat. O, kiek doar lopt toch n mìns. Wat let dij doar achter … wacht es even, zai ik dat goud? Joa, der is weer petat!

 

Hongersnood dreigt voor stadsduiven: ‘Het wordt een massaslachting’ (Sikkom.nl 01-04-2020) https://www.sikkom.nl/hongersnood-dreigt-voor-stadsduiven-het-wordt-een-massaslachting/


Coronahond

 

'Kin dokter wel kommen, k vuil mie slim lebait. k Bin poesteg en koorzeg. Zol t corona wezen?'

'De dokter komt straks bij u met Pasja, mevrouw De Wit.'

Dokter blift in de koamerdeure stoan. 'Bin je wies mit honden, vraauw De Wit?'

'Joawel, wat den?'

'Den komt Pasja joe onderzuiken. As ze blaft, is t corona.'

Pasja snuvvelt en snoft, blaft nait en lopt kwispelnd weer op dokter tou.

'Goed zo, Pasja! Niks biezunders, vraauw De Wit, bloots n griepje. Neem joe mor n poar aspirientjes.'

'Bedankt hor, dokter.'

'Bedank Pasja mor. Beterschap!'

 

Honden kunnen coronavirus mogelijk ruiken’ (Telegraaf.nl 17-04-2020) https://www.telegraaf.nl/nieuws/991543058/honden-kunnen-coronavirus-mogelijk-ruiken