SKV

Wie Grunnegers hebben de noam lu van waaineg woorden te wezen. Dat mag ook uut t waark van ons schrievers blieken. De Grunneger schrieverij laint zoch meroakel veur t SKV (Slim Kört Verhoaltje). Dizze verhoalvörm is bie ons introduceerd deur onderwiezeres en veurmoaleg streektoalvraauw Ingeborg Nienhuis, noar veurbeeld van t ZKV (Zeer Kort Verhaal) van de Nederlandse schriever/columnist A.L. Snijders. d’Uutdoagen van t SKV is om n kompleet verhoal te vertellen in minder as 100 woorden. Bie t tiedschrift Kreuze is stee veur schrievers om heur SKV’s te publiceren. Ik schrief ook wel es n SKV, de vief nijsten binnen hieronder te lezen.


Knappertjes

‘n Bos holt veur de deure as haarfst in t Slochterbos’, zo nuimt Erwin de Vries t in zien laid Grunneger Wicht. Heur daip uutsneden haalsgat kon niks verbaargen. Ze zat n knappertje te eten, zo aine van Wieringa, dij zo krummelt. Haar ze der mor n haand onder holden … de krummels vuilen in heur Slochterbos. As je dij doar zitten loaten, zel dat vervast jeuken goan. Mor hou krieg je ze diskreet weer vot? Nait … ze zat schoamteloos in heur Slochterbos te vissen.
As ik nou n knappertje van Wieringa eet, denk ik weer aan dat wicht.


Bratwurst

‘NEIN, NEIN, NEIN!’ Adolf ontploft. ‘Kein Bratwurst, heb ik zegd! Joe waiten dat ik vegetoariër bin! Wèl het dat bestèld?!’
Gainaine zegt wat.
‘Goud, k zel mild wezen. Dij t nou eerlek zegt, mag zulf zien waarkkamp uutkaizen.’ Zien kaalmere toon paast nait bie Adolf zien roodvergrèlde kop.
Frau Junge lopt binnen. ‘Herr Führer, hier is n telegram van Wi…’
‘Geef hier!’ Adolf rit heur t pepier uut d’haand en leest: ‘Dear Adolf … wie waiten dastoe vegetoariër bist … enjoy your Bratwurst … mostderookmosterdop? … Winston.’
Der wordt grinnikt.
‘Laag nait! Joe hebben mie veur t zootje! Sodemieter op, aalmoal! RAUS!!!’