W Series Hockenheim: Zege Chadwick, Visser op P4

Foto: W Series

Hockenheim – d’Eerste wedstried in de nije W Series is lesten zotterdag wonnen deur Jamie Chadwick. De 20-joarege Britse vertrok van pole position op t vernuimde Duutse circuit. In d’eerste ronde verloor ze kört de koppositie noa n remfout, mor heroverde de macht om doarnoa tot de finish veuraan te blieven. Beitske Visser waarkde zoch vanòf d’achtste startploatse op noar P4.

Chadwick haar eerder op de dag mit groots machtsvertoon de pole-position veroverd. De regerend kampioene in de MRF Challenge kwalificeerde zoch in de regen 1,8 sekonde sneller as de noast heur startende Fabienne Wohlwend (Liechtenstein). De race wuir onder dreuge omstandegheden verreden en weer was Chadwick, op ain foutje noa, de beste.

Chadwick haar n goie start, al kwam ze nait ains as snelste van t stee, en haar al noa d’eerste bochte n poar woagenlengtes veursprong. In de hoarspeldbochte verremde ze zoch, woarmit ze heur ploatse verloor en achter heur landgenote Sarah Moore aansloeten mos op P2. Op t zulfde stee gebeurde in t achterveld n aanrieden. De Finse Emma Kimiläinen haar n slechte start en vuil terugge van de vaarde noar de dattiende ploatse. d’Op de zeuventiende ploatse liggende Kanadese Megan Gilkes misde haldaal heur rempunt en ramde Kimiläinen vol van opzied. Baaident bleven ongedeerd, mor heur race was veurbie.

Deur dizze aanrieden mos de Safety Car in de boane kommen om de wedstried te neutraliseren. Mit nog 20 menuten op de klokke wuir de race weer vrijgeven. In de twijde bochte noa de herstart ging Chadwick veurbie aan Moore om de laaiden nait weer òf te stoan. Aan de meet was t verschil mit heur noaste tegenstanders nait groot: Alice Powell endegde as twijde op 1,3 sekonde, veur Marta García, dij 1,7 sekonde achter Chadwick lag.

Beitske Visser finishte op 3,5 sekonde achter Chadwick as vaarde. In de kwalifikoatsie was de Nederlandse nait wieder kommen as P8 deur n perbleem mit de turbo. In de race lag ze al noa ain ronde op P6 noa t inhoalen van d’Italioanse Vicky Piria en t wegvalen van Kimiläinen. Noa de herstart ging Visser veurbie aan Wohlwend noar P5. Ze kreeg P4 in handen toun Moore wied ging in de hairpin. Visser pebaaierde votdoadelk n aanval op Garcia veur de daarde ploatse, mor zunder sukses. Doarnoa kwam Visser zulf n poar rondes onder druk te stoan van Wohlwend, mor wos heur vaarde ploatse te verdedigen. Uutendelk haar Visser 2,3 sekonde veursprong op Moore, dij Wohlwend loater nog veurbieging. Achter nummer zèsse Wohlwend beston de top-tiene wieder uut Miki Koyama, Tasmin Pepper, Gosia Rdest en Caitlin Wood.

Wèllen: W Series, Motorsport.com

Geef een antwoord

Het e-mailadres wordt niet gepubliceerd. Vereiste velden zijn gemarkeerd met *