Wolma is nog laank nait kloar

Fries Wolma (1948) zit van t joar al zesteg joar in de meziek. Hai begunde al op 14-joarege leeftied, as sologitarist in de Stad-Grunneger beatband The Javelins. Noadat dij in 1968 uut nander goan binnen, het Wolma in verschaaiden aander bands en duo’s zaten as zanger en/of gitarist. Wieder is hai aktief as tekstschriever, komponist en producer en het e zien aigen ploatenlabel.

Toch was hai t langste aan d’loop mit The Javelins, dij vanòf 1977 weer in heur olle bezetten bie nander west binnen. d’Eerste en ainegste moal dat de band wat doan het in t Grunnegs was mit Weerom Noar De Sixties, n soamenwaarken mit Pé & Rinus in 2007. Zol der meer inzeten hebben wat Grunnegstoaleg repertoire aangaait? Wie zellen t nooit waiten, want mit t uut tied kommen van zanger Jan Suiveer in t doarop volgende joar kwam definitief n ende aan t bestoan van de band.

Wolma ging deur mit meziek moaken en ging ook veul meer in t Grunnegs doun. Sunt 2010 binnen hai en Sijtse Scheeringa de gezichten en noamgevers van de Grunneger boerenrockband Zuver Scheerwol, mor ook as solo-artiest is Wolma aktief. Hai het ondertied n aantal singles uutbrocht, mor n hail album mit Grunneger waark was der tot zowied nait. t Zestegjoareg artiestenbestoan was n goie gelegenhaid om mor es aine op te nemen: Kinder Van De Zun.

Lesten zundag wuir t album prezenteerd bie t jubeleumfeest in Eetcafé de Boerderij in Oosterwietwerd. De jubeloares kon zoch verheugen in n waarme belangstèllen: de zoal zat vol, mor t was gezelleg drok. Veur de gelegenhaid was d’inrichten wat feestelker moakt mit kleurrieke schilderijen van kunstenoar Jaap Stevens uut Wìnzum, dij ook n illustroatsie moakt het veur de cd-hoes. d’Indrukwekkende lengte van Wolma zien loopboan wuir onderstreept deur foto’s van hom deur de joaren hìn te projekteren. In t veurpergram zong de jonge Grunneger countryzanger Krzysztof Groen. Jetta Post interviewde Wolma over t album en over zien muzikoale loopboan. Onder de nuimer Fries & Friends brocht Wolma, mit aal de muzikanten dij aan d’opnoames mitwaarkt hebben, n aantal nummers van de cd live te heuren. Tot slöt langde hai t eerste eksemploar van de cd uut aan zien joarenlange muzikoale vrund Jur Eckhardt.

De gespeulde nummers wuiren mit veul enthousiaste reaksies verwelkomd en veul lu hebben t album kocht. Gounent vonden dat de middag wat te gaauw veurbie ging, zo as zo voak, as t mooi gaait. Zowel d’artiest as de touheurders kinnen weerom kieken op n gesloagd feest.

Fries Wolma zit zesteg joar in de meziek, mor liekt nog zeker nait in de noadoagen van zien carrière te zitten. Hai is nog sikkom aal doagen in zien studio aan d’loop en staait nog altied energiek en mit veul plezaaier op de planken. Kinder Van De Zun zel zekerwoar nait t leste wezen wat we van hom heuren, want ook noa zesteg joar in de meziek is Fries Wolma nog laank nait kloar.