Mien leven in meziek

Op zundagmörgen kin je op Radio Noord altied luustern noar Leven In Muziek, woarin n prominente Grunneger zien of heur levensverhoal vertelt aan d’haand van de soundtrack van t leven. In gesprek mit René Walhout, Eva Hulscher, Henk Elderman, Pieter de Hart of Bram Douwes nemt de gast ons mit langs de meziek dij n belangrieke rol in zien/heur leven speult.

De soundtrack van de gast begunt mit de grootste hit van zien of heur geboortedag. As de gast geboren is in 1965 of loater is, is dat steevast de nummer 1 in de Nederlandse Top 40. Doarveur was der nog gain landelke hitlieste, mor bie d’oldere gasten is zeker ook kozen veur n destieds slim populair nummer. Ik bin van 9 september 1973, toun ston Rote Rosen van Freddy Breck bovenaan in de Top 40. Dat zel zeker beantwoorden aan de muzikoale smoak van mien ollu. Zai keken en kieken geern noar o.m. de Duutse amusementspergrammen mit volksmeziek en schlagers. Dat is meziek uut mien jeugd, woar k nait per se n hekel aan heb, mor woar k ook nait uut aigen keus noar luuster. Mien muzikoale smoak het zoch n aander richten op ontwikkeld. Veur mien geboortedag kin k der al hail wat aans tegenover zetten …

In de Daverende Dertig, de veurloper van de hedendoagse Nederlandse Single Top 100, ston noamelk op dij dag Radar Love van Golden Earring op nummer 1. k Mag rockmeziek ook wel lieden, den is ain van de grootste internationoale hits van Nederlandse bodem gain maal begun van de soundtrack van mien leven.

[Wordt vervolgd]