De soundtrack van joen leven
Op woensdag 23 juli is componist, gitarist, zanger, tekstschriever en producer George Kooymans uut tied kommen, deur de gevolgen van ALS. Hai was 77 joar. Kooymans was vanzulf veuraal bekend as ain van de oprichters van de rockgroep Golden Earring.
Ain van grootste Golden Earring-hits is vanzulf Radar Love, n nummer dij George Kooymans mit Barry Hay schreef veur t album Moontan uut 1973. t Betaikende d’internationoale deurbroak van de band. Dat t n staark nummer is, bliekt uut de meer as 900 covers dij dervan opnomen binnen en dat ook bands as U2 en Metallica t ten uutvoer brocht hebben. In 2024 verscheen zulfs n danceversie, mit de goudkeuren van de volledege band, dij aiglieks niks mit zukse meziek hebben. Der is n webstee dij n haile tiedliene volgt vanòf t ontstoan van t nummer tot aan de dag van vandoage. Ter ere van t 50-joareg bestoan van Radar Love verscheen n biografie van nait minder as 248 bladzieden over de levensloop van t nummer. Je kinnen gerust zeggen dat Kooymans en Hay n meesterwaark òfleverd hebben.
Ik bin geboren op 9 september 1973, op dij dag ston Radar Love op nummer 1 in de Daverende Dertig, de veurloper van de hedendoagse Nederlandse Single Top 100. Der binnen mindere nummers woarmit de soundtrack van joen leven begunnen kin. t Contrast mit de nummer 1 in de Nederlandse Top 40 van dij dag is groot: Rote Rosen van de Duutse schlagerzanger Freddy Breck.
End 2020 kreeg George Kooymans de diagnose ALS en mos stoppen mit optreden. De bandleden waren t mit nander ains, dat zunder ain van heur varent Golden Earring nait bestoan kon. In feberwoarie 2021 wuir den ook bekendmoakt dat dit t ende van de band betaikende. Op dunderdag 11 meert 2021, George zien verjoardag, om 17:15 uur draaiden de landelke Nederlandse radiozenders Radar Love as eerbetoon.
In jannewoarie 2026 willen Barry Hay, Rinus Gerritsen en Cesar Zuiderwijk toch nog n optreden geven. Onder de nuimer One Last Night zellen ze De Vrienden van Amstel Live òfsloeten, doarin biestoan deur verschaaiden aander bands en artiesten. t Optreden komt der mede op George zien initiatief.
George, bedankt veur dizze biedroage aan de soundtrack van mien leven. Rust zaacht.
