Regio Songfestival: ik vin Alles Goud
Loat k eerst Iwan Esajas & Jeroen Russchen felesiteren mit t winnen van t Regio Songfestival. k Heb t nait zain, mor in de nijsberichten las k dat ze mit heur nummer Alles Goud van zowel de vakjury as van t pebliek de mainste punten kregen hebben en doardeur mit n stroatlengte veursprong op de rest endegd binnen.
k Heb t dus nait zain, want ik kiek nait noar songfestivals. Ik begriep nait zo goud woarom van meziek n competitie moakt wordt: n riege artiesten komt veurbie om elk n nij laid te zingen en aan t ende van d’oavend wordt bepoald wat t beste is. Meziek is ja n kwestie van smoak, in dij zin is vanzulf nait recht objectief t ‘betere’ laid aan te wezen. Den vaalt veur n pebliekspries nog wel wat te zeggen.
‘Mor doe stemst toch elk joar veur de Grunneger 1000?’ Joa, dat dou k, mor den kin k nummers invullen dij k zulf mooi vin en huif k nait kaizen uut dattien nummers dij je op ain oavend prezenteerd kriegen. Doar huift gain wedstriedelement in zitten. k Geef den ook gain stemadvies veur n bepoald nummer of artiest (joa, stem Grunnegs, mor ook dat mout je zulf waiten). Om mie huiven artiesten ook gain oproup doun om op ain van heur nummers te stemmen en wat k haldaal òfkeur, binnen acties om ain bepoald nummer hoog in n hitlieste te kriegen.
‘En doe gingst eerder ook noar t Bosklopper Gala!’ Joa, doar wuir de beste Grunnegstoalege single van t joar verkozen. Mor doarbie ging t den om nummers dij in de loop van n joar al uutbrocht waren en nait ter gelegenhaid van n laidjeswedstried schreven binnen.
t Is mooi veur Iwan & Jeroen dat ze wonnen hebben, en veur RTV Noord dat zai aander joar november t Regio Songfestival organizeren maggen. t Wordt vervast weer n groot feest veur de laifhebber. Hou en woar ze dat doun, en wat den d’aigen inzenden wordt … ik vin Alles Goud. k Reken dat ik der toch nait noar kieken goa.
