Studenticonisch
Ons iconische muzikoale duo Pé & Rinus het weer es wat te vieren. Begun 1980 zongen Peter de Haan en Frank den Hollander mit zien baaident veur t eerst n laid. Dat akkedaaierde zo goud, dat ze 45 joar loater nog mit net zoveul lol optreden en laidjes moaken. Reden genog om weer de theoaters langs te trekken mit De Containers.
Vanzulf gaait t weer volgens n vertraauwd Pé & Rinus-recept, mit n aantal olle hits en verrazzende nije laidjes. De band is veur de gelegenhaid uutbraaid mit n nije muzikant: in De Containers 2.1 speult Peter zien bruier Wiebe speult mit op gitaar. t Gehail staait weer garant veur twij uur feest.
De vieren van t 45e jubeljoar wuir op 5 juli òftrapt mit n optreden op t dak van t Grunneger Forum. Ooit was der n Engels bandje genoamd The Beatles (meschain heb je der wel es van heurd) dij aargens op n dak ston te speulen, mor dat was vanzulf nait zo’n iconisch stee as onder d’Olle Grieze. Om dij Beatles aan wat ekstroa auteursrechten te helpen (dij jonges mouten ook ja wat verdainen), hebben Pé & Rinus n nummer van heur opnomen, mit n aigen tekst: in Te Gek kieken ze weerom noar heur begun as duo. Ze geven ook n biezundere aigen invullen aan n aander Beatles-nummer, Don’t Let Me Down.
Zo kommen meer Pé & Rinus-versies veurbie van nummers van gewoardeerde vakgenoten. Echte fans waiten wel dat meerdere nummers òfkomsteg binnen van The Kinks. Rinus haar mit Foxhol, Foxhol al n mooie variant op n Sinatra-klassieker op zien noam. Nij veur heur baaident is Loat t Bie Mie, noar n nummer van de Everly Brothers. De jonges van n Zweeds bandje genoamd ABBA moaken zoch zörgen over t stiegen van de zeespaigel, dat Nederland doardeur onder wotter komt te stoan en dat zai doar in Zweden dammeet mit n bult klimoatvluchtelingen kommen te zitten. Pé & Rinus moggen ain van heur beschaaiden hitjes bruken om dat gevuil te vertolken, dat is Watersnood worden.
Pé & Rinus binnen zoch altied bewust van de tiedgeest, en waiten zoch tekstueel doaraan aan te pazen. Zo’n tekst as van Jelle, dat kin anno 2025 toch echt nait meer. Doarbie is Jelle zulf ook veul veraanderd, dus mag zien noam wel es zuverd worden. Vanzulf binnen Pé & Rinus nait te beroerd om zochzulf nou te corrigeren en endelk t goie verhoal te vertellen.
Toun Pé & Rinus in 1984 ‘òfschaid` namen, waren ze al n vaste weerde worden in de Grunneger meziek. Mor in de dikke 40 joar doarnoa binnen ze pas echt uutgruid tot muzikoal Grunneger aarfgoud. zunder bloots op t olle succes te teren. De hits uut dij tied binnen stuk veur stuk klassiekers, mor ze waiten ook nog aal mit nije nummers te verrazzen en olle teksten bie de tied te brengen.
In 1980 gaven twij studentikoze stroatmuzikanten veur t eerst n optreden mit zien baaident. Ondertied binnen Peter de Haan en Frank den Hollander 45 joar older worden, mor op Pé & Rinus liekt de tied nog nait veul grip te kriegen. Zai binnen nog aal t studenticonische duo in de Grunneger meziek!
