Alweer

As k noar t thoater goa, is dat voak noar VanBeresteyn in Veendam. Dij hebben mainsttied t braidste en beste aanbod aan (meziek)veurstèllens in t Grunnegs. Ik kom der wel n poar keer in t seizoen en bliekboar vaalt dat op. Lesten vrijdag was k der alweer. Noa de veurstellen luip k DvhN-verslaggever Louis van Kelckhoven tegen t lief. Hai was vleden weke, as jurylid, ook bie t Bosklopper Gala. ‘Doe woonst hier zowat,’ zee e tegen mie. Dat nog net nait, Louis, mor k bin wel min of meer n stamgast.

Dizze veurstellen was traauwens nait in de Grunneger meziek. De grootste artiest in t Nedersaksische toalkontraain, Daniël Lohues, gaf n optreden mit zien nijste pergram Moi. t Was n oavend noar Lohues zien vertraauwde resept: as n troebadoer staait hai allenneg op t podium om zien verhoalende laidjes te zingen, zochzulf begelaaidend op akoestische gitoar of op de vleugel. Tussendeur vertelt e schiere verhoalen mit zien typische, dreuge Drìntse humor.

Schaande genog is de titel van dizze blog, Alweer, ook hier van toupazen. Hai het der wel es muzikoale pazzipanten bie hoald, mor t idee is altied t zulfde: de zingende verteller dij mit ambachtelk gemoakte laidjes bie t pad is. Doarin het e zoch al meer as genog bewezen. k Wil nait zeggen dat t mie tegen vuil, mor hai was nait verrazzend of vernijend.

Hai vertèlde over zien hoat-laifdeverholden mit de blues. n Echte bluesmuzikant schient de blues over zochzulf òf te roupen. Ain van de leden van de Louisiana Blues Club rakt aalgedureg in de perblemen, o.m. mit drugs en geldnood. k Gun Daniël Lohues nait dat hai in de blues belandt, mor k hoop aargens wel dat in zien verholden mit dizze meziek n regel uut n laid van hom nog weer woar wordt: En as de liefde mar blef winnen / komp ‘t allemaol wel goed.

Mainsttied koop k noa de veurstèllen t biebeheurende album. k Leuf nait dat de cd Moi al verkriegboar was, mor k was ook nait van plan hom mit te nemen. In mien cd-rikje zitten al elf albums dij Lohues in de post-Skik periode moakt het. d’Eerste twije binnen mit de Louisiana Blues Club. De negen dij doarop volgen, binnen min of meer volgens t zulfde resept moakt. t Stee veur t twaalfde album blift veureerst leeg. As dij al op Spotify staait, goa k doar eerst luustern, den kin k hom altied nog kopen.

Dij nog nooit in t theoater noar Lohues west het, zel k zekerwoar aanroaden om es n moal hìn te goan. Mor as k eerlek bin, denk ik dat ik es n joar overspring. Of hai mout al zien verstaarker weer òfstovven om n stevege bluesploade op te nemen of mit n Skik 2.0 te kommen. Den bin k der vervast weer bie.