Jan Henk de Groot krigt de K. ter Laanpries
Zanger-laidschriever Jan Henk de Groot is uutroupen tot winnoar van de K. ter Laanpries 2024/2025, veur zien verdainsten veur de Grunneger toal en kultuur. Dat is n dik verdainde onderschaaiden veur ain van de populaiste en mainst toonaangevende artiesten in de hedendoagse Grunneger meziek.
De K. ter Laanpries is n mooie aanvullen op De Groot zien erelieste. In zien muzikoale loopboan het hai al meerdere priezen in de wacht sleept. In 2001 won hai as zanger en veurman van zien Engelstoalege band Henkus de pebliekspries tiedens de Grote Prijs van Nederland. Hai won de DvhN streektoalpries twij moal, in 2014 en 2020, veur zien albums Weerom en De Wolf Is Trug. In 2014 kreeg e de Grunny van RTV Noord, veur zien verdainsten in de Grunneger meziek.
De belangriekste pries in de Grunneger toal en kultuur krieg je nait morzo. Sunt dat Jan Henk de Groot in 2013 aan d’loop ging mit de streektoal, het hai al veul schiers biedroagen aan de Grunneger meziek. Mit nummers as De Mamme Van Michel en Kielsterachterweg het e al regelrechte klassiekers op zien noam stoan. Zien weerde en vakmanschop as tekstschriever kommen goud noar veuren in nummers over oorlogsverhoalen dij we nait vergeten maggen, zo as t troagische löt van De Drij Van Woudbloem of de heldendoad dij verricht is in t Hoeske Aan De Krommewiek. Op t podium speult e net zo makkelk solo mit bloots n gitaar as mit n volledege band of n aander meziekgezelschop. As lid van t Grunneger supertrio De Troebadoers (mit Edwin Jongedijk en Alex Vissering) staait hai altied veur uutverkochte zoalen. Ook noast de bühne dut e belangrieke dingen veur en mit kollegoa-artiesten.
De priesuutlangen was lesten vrijdag, zo as gewoonlek in restaurant De Boerderij bie de Fraeylemaborg in Slochter, in n bieainkomst veur geneudegden. t Gezelschop beston uut vrunden, femile en kollegoa’s van de prieswinnoar, veurmoalege prieswinnoars en aander toalaktieve Grunnegers.
Noa d’inloop mit kovvie en Grunneger kouke en t welkomstwooord van Jan Groenbroek, veurzitter van Stichting t Grunneger Bouk, brocht De Groot n aantal nummers te heuren. Eerst zochzulf begelaaidend op gitaar, doarnoa mit pianist en orkestlaaider Reinout Douma van t Noordpool Orkest aan de vleugel. t Was n veurpruifje van de theoatertoer dij begun 2027 op t pergram staait. Doarveur worden nije laidjes schreven en bekende laidjes nij arrangeerd. Dat geft weer n nij facet aan de diversiteit dij Jan Henk de Groot as podiumkunstenoar in zoch het.
t Uutlangen van de K. ter Laanpries is altied n toak veur de Grunneger gedeputeerde van kultuur. Susan Top prat gain Grunnegs, mor pebaaierde wel n dail van t juryrapport in t Grunnegs veur te lezen. t Vuil de jury (Jan Groenbroek, dichteres Fieke Gosselaar en journalist Louis van Kelckhoven) nait tou om de verdainsten van de winnoar te omschrieven. Nait omdat dij verdainsten der nait wezen zollen, mor ze binnen zo talriek dat t meer de vroag is woar te begunnen. Boeten zien aigen artistieke biedroagen en de priezen dij e dermit wonnen het, is ook noast de bühne zien aanwezeghaid in de Grunneger meziek maarkboar. As gastheer van t streektoalpergram Aigenhaimers bie theoater Kielzog gaait e in gesprek en moakt e meziek mit kollegoa-artiesten. As docent songwriting geft e zien kennis en ervoaren deur aan n nije lichten muzikanten. Mit de verschaaiden muzikoale gezichten dij hai al toonde, stelt de jury dat Jan Henk de Groot n kameleon is in de goie zin van t woord. Noa dizze lovende woorden kreeg hai uut handen van Susan Top n cheque van doezend euro en n beeldje van kunstenoares Natasja Bennink uut Aizen toulangd.
…
De prieswinnoar gaf nog n optreden mit Reinout Douma op de vleugel. Doarnoa was der, onder t genot van n hapje en n drankje, gelegenhaid om persoonlek te proaten en felesitoatsies over te brengen aan Jan Henk de Groot, dij zichtboar groots was op t in ontvangst nemen van zien K. ter Laanpries.
