Big in Delfziel
Populaire artiesten dij mit n groot meziekgezelscbop optreden, dat kin veur biezundere veurstèllens zörgen. In theoater De Meulenbaarg in Delfziel was lesten zotterdag Grunnegers in Concert 2, mit de Eemsmond Big Band en n keur aan Grunneger artiesten. In feberwoarie 2024 was der al zo’n concert west, dat was zo’n groot sukses dat n twijde dail nait uutblieven kon.
Onder begelaaiden van de 18-koppege band, verschenen verschaaiden artiesten van Grunneger bodem op de bühne. Zai wuiren aankondegd deur Agnieta de Bruin, zulf vaste zangeres van de Eemsmond Big Band. Eerst was de beurt aan Rieks Folgerts en Ronald Nihot, mit n ode aan de Everly Brothers. En aan de Askay Brothers, t duo dat Rieks mit Johan Raspe vörmde as Grunneger tegenhanger van de bruiers Everly. Johan is al even nait meer onder ons, dus de Askay Brothers bestoan nait meer, mor in Ronald Nihot het Rieks n goie zangpartner om de Askay-meziek leventeg te holden.
Alex Vissering heb k voaker optreden zain mit grode gezelschoppen. Verschaaiden nummers van hom lainen zoch goud veur n arrangement mit n orkest. Dat geft toch al mooie nummers as Mien Machteg Wad en De Groanrepubliek nog wat ekstroa’s. Arnold Veeman kin ook goud uut de uut de vouten mit de begelaaiden van grode ensembles. n Bekende versie van zien nummer Mien Grunneger Stad is dij van keunenksdag 2018, mit t Noordpool Orkest. Dat gezelschop is veul groter as de Eemsmond Big Band en kin den ook grootser uutpakken mit t arrangement, den binnen der ook striekers bie. Dij hebben ze bie de bigband nait. Doarmit bleef t dichter bie zien originele, meer chanson-achtege uutvoeren, dij nog net even wat mooier is.
Fransien Kuiper brocht laidjes te heuren uut aigen repertoire, en van De Tuutjefloiters, t trio dat zai ooit vörmde mit heur voader Geert en taande An. Ze wol t pebliek mit enkele laidjes mitzingen loaten, mor bie wat meer luusterlaidjesrepertoire waarkt dat toch nait zo goud. Jan Veldman wait t pebliek zunder probleem mit te kriegen, zien tragikomische laidjes as De Traainconducteur en Doen In Oskerd doun t altied goud.
Nait alle optredende artiesten binnen bekend van de Grunneger toal. Blueszangeres Gina de Boer kreeg in 1986 al bekendhaid mit heur Soundmixshow-vertolken van Janis Joplin en won in 2024 d’Italioanse tv-talentenjacht The Talent Catcher. Ook as 65-pluzzer het ze nog n krachtege, groezege stem en kin ze mit n bigband net zo’n staark optreden geven as mit heur bluesband. Pieter van der Zweep is bekend as Nederlandstoalege zanger. Hai het t nog nooit pebaaierd in t Grunnegs, mor wil nait uutsloeten dat ooit nog es zukswat gebeuren gaait. Hai treedt voaker op mit de Eemsmond Big Band. Dizze oavend brocht e evergreens as Save the Last Dance for Me te heuren. Noast de prezentoatsie dee Agnieta de Bruin nog muzikoale biedroagen. O.m. zong ze op de wieze van Anita Meyer heur Why Tell Me Why n laid over de Grunneger toal.
Dit twijde dail van Grunnegers In Concert was n gevarieerde muzikoale oavend. Net as de veurege keer ston n verschaaidenhaid aan artiesten uut Grunnen op t podium. Ondersteund deur de Eemsmond Big Band brochten zai biezundere uutvoerens te heuren van aigen nummers of bekende evergreens. t Huift nait bie twij moal te blieven. Wie hebben ja zoveul goie artiesten, aal of nait bezeg mit de streektoal, dat Grunnegers In Concert tot n mooie riege veurstèllens uutgruien kin. De Meulenbaarg en de Eemsmond Big Band maggen meer regionale artiesten big in Delfziel moaken.
Hieronder de videoclip Delfziel van de Eemsmond Big Band uut 2005.
