t Is wel Bert Visscher
k Was nog nooit noar n veurstellen van Bert Visscher west. Zien grode onemanshows haar k vervast nait aankind, omreden dat e doarin zo drok is. As k doar wat van op tv zai, wor k der al doodmui van. Dij grode shows dut hai nou nait meer, zol dat mit de leeftied te moaken hebben? Want lestdoags is e 65 joar worden. Meschain veur hom ook n leeftied om t wat rusteger aan te doun.
t Op de planken stoan, kin Bert Visscher vervast nait loaten, mor hai kin t ook wel es aans doun. n Poar joar leden was hai al even bie t pad mit Bert leest Kees, woarin e verhoalen veurlas van zien voader, de Grunneger schriever Kees Visscher. Veur t eerst dat Bert wat dee in de Grunneger toal. Doar haar k wel bie wezen wild, mor zo as altied (t is wel Bert Visscher, ja) was t in n mum van tied uutverkocht.
Zien 65e verjoardag kon nait onopgemaarkt veurbiegoan. Hai kreeg eerst al n surpriseparty in kefee De Sleutel in Stad, mit vrunden, kennizzen en mìnsen woar e mit waarkt het, Mor t pebliek mag ook in de feestvreugde dailen. Doarveur gaait t vanzulf de theoaters langs. Onder de nuimer Bert Visscher 65, Dat Zou Je Niet Zeggen gaait e zingen (kin e dat den ook?) en verhoalen vertellen.
Begelaaid deur t Noordpool Strijkkwartet en pianist Reinout Douma brengt Bert zien favoriete laidjes te heuren, Tussendeur vertelt hai staarke verhoalen. t Zol gain typisch Bert Visscher-cabaret worden, dus gain kolderieke veurstèllen mit n hoge grapdichthaid. Mor der vaalt toch genog te lagen, want t is wel Bert Visscher. Hai legt ons eerst uut hou e zien typetjes bedenkt, voak is doar nait meer veur neudeg as n proeke, n klaidingstuk en n rekwisiet, de grap komt den hoast vanzulf. Wieder vertelt Bert hilarische anekdotes over gebeurtenizzen bie zien optredens en zain we filmpies van mislukte opkomsten. Mor hai gaait dus veuraal zingen.
Zien opkomst is … Visscherioans energiek, om t zo mor te zeggen, mit n uutvoeren van t Italioanse laid Bella Ciao, zo as meugelk allenneg hai dat kin. Bie t opzwepende Liefde Voor Muziek van Raymond van het Groenewoud gaait hai de zoal deur. Mit laidjes dij wat rusteger en serieuzer binnen, kin e zeker ook op zien stee stoan of zitten blieven. k Leuf nait dat Bert n grootse zanger is, mor op n aigen gevuilvolle menaaier brengt e mooie eerbetonen aan gewoardeerde vakgenoten as Maarten van Roozendaal, Toon Hermans en Herman van Veen. De Grunneger toal komt ook aan bod, mit Ede Staal zien Zalstoe Altied Bie Mie Blieven.
k Wos in t veuren nait wat k verwachten kon bie n zingende Bert Visscher. Wie kinnen hom veuraal as grappenmoaker, en dij is ook nou nait wied vot (t is wel Bert Visscher, ja), mor hai kon hier es n aander kaande zain loaten. Meer van zochzulf, noar aigen zeggen. Doarbie blift e entertainend, ook veur lu zo as ik, dij zien … cabareteske intensiteit wat minder goud lieden kinnen. Zo is n oavendje Bert Visscher goud te doun. As e dit vastholdt, kom k vervast voaker n moal kieken.
