Goie vibroatsies
n Moal wat aans as meziek in de streektoal. k Was wel even tou aan wat Good Vibrations. Dij krieg je van meziek van The Beach Boys. Vanòf 1961 namen bruiers Brian, Carl en Dennis Wilson, neef Mike Love en schoulkammeroad Al Jardine mit heur vuildiegoud-meziek de fans mit in heur onbezörgde Californische jeugd, toun t leven van jonges as zai veurnoamelk beston uut auto’s, wichter en … joa … surfen.
65 joar loater is gain van de bruiers Wilson meer in leven, mor Mike Love en Al Jardine speulen nog aal onder de noam The Beach Boys op grode internationoale podiums en festivals. t Lutje Nederland zellen ze vast nait zo gaauw meer aandoun. Mor dat dut niks, om t typerende geluud van The Beach Boys live te ervoaren, huif je de grup nait meer over.
In t noajoar van 2025 kon tv-kiekend Nederland kennismoaken mit n tributeband, dij zoch oardeg goud meten kin mit t origineel: Beach Boys’ Best. Zai wonnen (gedaild mit Donna’s Hot Stuff) t viefde seizoen van The Tribute – Battle Of The Bands. Noar t schient lag t nivo van de dailnemende bands hoger as in veurgoande seizoenen. Gounent brochten ook overtugend t geluud van heur grode veurbeeld te heuren. Doarbie bleek Beach Boys’ Best, n ploug jonge jonges zunder nuimensweerdege podiumervoaren, vanòf t eerste optreden hoog te scoren bie jury en pebliek.
[wordt vervolgd]
