Blikken Lieske
‘Kinst hom in aal kleuren kriegen, as t mor swaart is.’ Aan dizze uutsproak van Henry Ford mos k denken, toun ik n moand of wat leden mien nije rolstoule kreeg. k Mog mie n kleur uutzuiken, ik kon uut vieve kaizen. Zulvergries leek mie wel goud tou, dus k koos veur Platinum Silver. Toun k hom uutèndelk kreeg, bleek e ook swaart te wezen.
Henry Ford zee dat over t vernuimdste model van zien Ford Motor Company, de Model T. d’Eerste auto dij aan d’lopende baand en in dikke aantallen moakt wuir. Tin Lizzy het de massa motorizeerd. Mor swaart was nait d’ainegste kleur. Staarker nog, van 1908 tot 1914 was de Model T zulfs nait in t swaart te kriegen. Hai was standoard verkriegboar in gries, gruin, blaauw en rood. In 1912 kwam der wel n ain-kleur-strategie, ale T-Fords wuiren donkerblaauw mit swaarde sputterbreden. Noa 1914 wuir veur swaart as ainegste kleur kozen, omreden dat dij lak t gaauwste dreuge was. Doarmit was de produksie van n auto in n körtere tied kloar, van dij gevolgen dat der meer T-Fords baauwd en verkocht worden konden. t Zel vervast ook gekoper west wezen om mit ain kleur te waarken, den kon de verkooppries omdele en wuir n auto veur nog meer lu betoalboar.
En dat bleef zo totdat de verkoopsievers omdele gingen. Om meer kopers te trekken, waren vanòf 1926 weer meerdere kleuren te kriegen, mor dat holp nait meer. Blikken Lieske was inhoald deur de tied. In de negentien joar dat Henry Ford zien gaisteskind beston, wuir sikkom niks doan om t model wieder te ontwikkeln en te verbetern. De Model T was technisch verolderd en doarom nait meer in trek bie lu dij tou waren aan n nije auto. In 1927, noadat der dik 15 miljoun van moakt waren, luip de leste van de baand òf. Zien opvolger, de Model A, was verkriegboar in vaar standoard kleuren. Doar was swaart nait bie.
As t bie mien rolstoule nou net zo was as bie de A-Ford, haar k hom vervast wel in t zulvergries kregen. Nou wil k wieder nait over n kleur soezen. t Is gain mode-artikel en k mout t der n joar of mit doun. n Rolstoule huift nait opvalen, dij der in zit mout d’aandacht trekken (of nait, vanzulf). Swaart is mie net zo goud, mor haar mie den nait kaizen loaten.
