De beste versie van De Groot
De zanger-laidschriever schrift en komponeert zien of heur aigen laidjes en begelaaidt bie t optreden zochzulf op biev. gitaar of piano. Gounent speulen mit n band, mor voak binnen ze ook allenneg bie t pad as zingende verhoalenverteller, zo as de middelaiwse troubadours dat deden. Aan bloots d’aigen stem, ain instrumìnt en de, voak persoonleke, teksten hebben ze genog om n onderholdend optreden te geven. Verschaaiden Grunneger artiesten beheersen dij kunst. Doarin het elk n aigen stiel, dij nait per se liekt op wat n aander dut. Toch is t wel vervrizzend as aine n nije invullen deraan geft.
Noa drij albums volgens t traditionele man-mit-gitaar-resept was Jan Henk de Groot tou aan wat aans, hai wol nou es zuver moaken wat e zulf wol. Mit t nijste album Fiene slagt hai nije muzikoale richtens in. Vief joar leden was doarvan al n veurbode te heuren op De Wolf Is Trug, dij mit t nummer Satelliet n volweerdege, elektronische popsong bevat. De Groot zien muzikoale belangstèllen het zoch grotendails in de joaren 1980 ontwikkeld. In dij tied nam t gebruuk van elektronische instrumìnten as synthesizers en drumcomputers n grode opgang en dij kommen ook veulvuldeg veur in de meziek op Fiene.
Fiene, Grunnegers dij vrouger veul in de zaandbakke speuld hebben, herinnern zoch vervast dat ze dat zeden tegen t zaachte, gele zaand dat joe tussen de vingers deur glidt. Je hebben der gain vat op, net as op de tied. En mit dij tied blift veul in t vleden achter. Veuraal mìnsen binnen nait aiweg vast te holden en leven bloots deur in ons herinnern.
In t verlengde doarvan staait fien zaand ook veur n toukomst dij nooit in vervullen ging. t Titelnummer gaait over twij jonges uut Zuudhörn dij gain toukomst kregen, deurdat ze veul te jong uut tied kommen binnen bie n verkeersongeluk. t Gemis in t dörp woar De Groot opgruide was groot en hou laank dat dij gebeurtenizzen ook leden binnen, òf en tou kommen de jonges zomor even in zien herinnern veurbie: ‘zo stoeven ze òf en tou veurbie / as fiene in de lucht’.
Vleden joar ging Stiltecoupé as eerste single al aan t album veuròf en ston n poar weke op nummer 1 in de Noord 9. De Groot keerde doarmit weerom noar zien muzikoal begun, mit wat steveger gitaarwaark. Deur t nije geluud bin je der meschain nait geliek op verdocht, mor t is echt n De Groot-nummer mit n verhoalende tekst. t Gaait over n traainraaize noar Berlien woarbie hai de rust von om gebeurtenizzen van n joar eerder te overdenken. Der kwammen o.m. gedachtes aan zien overleden voader noar boven, dij je in de tekst weervinden. Voader en zeun De Groot haren nait zo’n makkelke omgang, mor doar is t gemis nait minder om. Deurdat senior gek op kikkers was, is ain verloren Kikker In De Kelder al genog om dat gevuil van gemis weer op te wekken.
Hoeske Aan De Krommewiek en De Drij Van Woudbloem bestonden al eerder as de plannen veur t nije album. Muzikoal binnen dizze baaide nummers wat meer van De Groot zien olle stempel, mor ze pazen goud binnen t motief dat in Fiene te ontdekken vaalt. t Binnen verhoalen over de Twijde Wereldoorlog. De Drij Van Woudbloem binnen de drij aarbaiders dij noa d’April-maaistoakens van 1943 doodschoten binnen bie de ploatselke eerappelmeelfebriek. t Hoeske Aan De Krommewiek staait ook wel bekend as t Knoalster Achterhuus, woar zestien onderdukers n vaaileg stee vonden. Dizze verhoalen maggen nait as fien zaand in t vleden verstoeven en mouten veur d’aiweghaid bewoard blieven. Zo as De Groot zulf ook in Hoeske … zingt: ‘zestien mensen leven deur / en zo mot ook dit verhoal’.
n Hedendoags oorlogsverhoal wordt verteld in Jasmien, over n vluchteling dij in Grunnen t leven weer op de rit pebaaiert te kriegen, noadat hai in aigen laand zien toukomstdreum as fien zaand vervlaigen zag. In de meziek van dit up-tempo nummer kin je wel d’onrust van t vluchten herkennen.
In t nummer Fleddermoes komt d’elektronische meziek goud tot zien recht as geluudseffekt. Je heuren as t woare t gefladder van zien vleugels onder de dakpannen. De sfeer is wat duuster en spoukachteg.
Deur te kaizen veur n elektronisch geluud is mit Fiene n album ontstoan woarop verschaaiden staarke popsongs stoan. Doarbie blift De Groot mit zien mooie, verhoalende teksten onverminderd bie de betere Grunneger laidschrievers en zingende vertellers heuren.
Verschaaiden artiesten binnen al es nije muzikoale wegen insloagen, wat heur nait altied deur fans in daank òfnomen is. Doarveur huift Jan Henk de Groot nait te vrezen, de reaksies en kritieken op Fiene binnen tot zowied unaniem positief. Deur meer veur zochzulf te kaizen en te moaken wat hai echt wol, het e zien mainst persoonleke ploade òfleverd. In dat opzicht krieg we in Fiene meschain wel de beste versie van Jan Henk de Groot te heuren.
