Lammerburen
Alhouwel k al joaren mit Grunnegs schrieven aan d’loop bin, heb k nog nooit waark òfleverd wat bie n wat groter pebliek bekend is. Want, eerlek genog: deur òf en tou wat in Kreuze te publiceren, wor je nog gain haile bekende Grunneger schriever. En mien blogs trekken tot zowied ook gain dikke riegen lezers aan. Nou bin k ook nait recht ambitieus, wat dat aangaait.
k Vuil mie den wel slim vereerd as n aander wat mit mien schrieverij doun wil. Doar is nou veur t eerst wat in gebeurd. Zonet is op Radio Noord n laid prezenteerd woarvan ik gedailtelk de tekstschriever bin: Lammerburen van Driefzand feat. Irene Wilkens.
n Joar of wat leden haar k al n Grunneger tekst schreven op Frankfurt Oder van Bosse feat. Anna Loos. k Heb mien versie de titel Boven Pekel geven. k Haar de tekst al n moal daild mit Alex Schoenmaker, de man en tekstschriever van zangeres Irene Wilkens. Dij haren tot zowied gain konkrete plannen om der wat mit te doun.
Nou holden Jan Peter Smit en Anne Jan van Aperloo, beter bekend as t muzikoale duo Driefzand (en de moakers van de podcast De Laidjestoavel, woarin ze gesprekken voerden mit verschaaiden Grunneger artiesten) mie in de goaten: zai hebben mien laidteksten lezen en gaven aan ze schier te vinden. Noa t lezen van Boven Pekel haren ze wel zin om es mit t nummer aan d’loop te goan. Doar was k slim bliede mit, n betere woarderen kon k nait kriegen.
Noar veurbeeld van t origineel en de Nederlandse cover Zoutelande van BLØF feat. Geike Arnaert mos t vanzulf wel n duet mit n zangeres blieven. Wat zol den meer veur d’haand liggen as n soamenwaarken mit de genuimde zangeres? Van baaide kanten zagen ze doar wel wat in. Der was al onderling kontakt, noadat Irene en Alex bie De Laidjestoavel aanschoven waren. t Duet kon vrij gaauw tot stand kommen.
Der is wel t ain en aander aan mien tekst veraanderd. Dat kin en mag vanzulf, n laidtekst mout ja goud zingboar wezen en bie d’uutvoerende artiest pazen. Ik bin gain ervoaren tekstschriever en, hail eerlek, (nog) nait in stoat om n tekst te schrieven dij zuver op de meziek paast. Doar mos nog wat in verbeterd worden. Aan de toal is ook wat veraanderd: ik as Oost-Grunneger proat en schrief net even wat aans as aine uut Noord-Grunnen, dat zit al in n simpel woord as ‘in’ of ‘ien’. Woar ik ‘ik bin bliede dast hier bist’ schreven heb, het Jan Peter doar veur Driefzand ‘ik bin blied dastoe hier bist’ van moakt. De mainst in t oog springende veraandern is vanzulf de ploatsnoam en dus de titel: de mannen van Driefzand hebben nait zoveul mit Pekel. Zai zöchten t meer in aigen kontrainen en kwammen uut op Lammerburen.
Zo as t heurt bie t opnemen van n cover, mout d’oorspronkelke artiest op d’högte steld worden as je wat mit zien nummer doun goan. Axel Bosse het der positief op reageerd. Mit zien akkoord kon t opnemen definitief deurgoan. Doarveur ging t noar Audiostudio De Fabriek in Veendam, woar mit Dik Pomp zien vakwaark n schier nummer ontstoan is, dij recht dut aan t origineel. Muzikoal blift t stoef bie Frankfurt Oder, doar was niks aan te verbetern. De stemmen van Jan Peter Smit en Irene Wilkens pazen goud bie nander. t Nummer dut niks onder veur d’originele Duutse versie.
Der is n officiële videoclip bie Lammerburen, woarveur professionele filmmoaker Robin Smit (zeun van Jan Peter) in d’aarm nomen is. d’Opnoames binnen moakt bie gemoal De Waterwolf, woar in t nummer over zongen wordt.
Lammerburen was zonet veur t eerst te heuren in Studio Grunn op Radio Noord.
Lammerburen
Dou niks laiver as mit die achter diek verkroepen
Of verhoezen noar de waarmte woar wie nait verzoepen
Mor wie hebben gain sinten en en veuls te min aan uren
Dus wie goan moar noar dien olders
ien Lammerburen
ien Lammerburen
En den zitten wie hier bie t gemoal van Electra
Wastoe vertelst holdt mie nuchter en waarm
en boven mien kop zug ik die grieze wolken
Ik bin blied dastoe hier bist
Blied dastoe hier bist
Wie zitten hier bie t gemoal van Electra
t Kon mie al nooit wat verschelen woar wie waren
Wie verzoepen onszulf in de draank van dien voader
Ik bin blied dastoe hier bist
Blied dastoe hier bist
Niks is beter as mit die op pad te wezen
Noar de miezegste steeën
En die bie mie te hebben
En te zain dat t goud gaait
Der is niks wat wie vrezen
en mit n klokje en met metworst
Tussen dieselmotoren ahaaah
En den zitten wie hier bie t gemoal van Electra
Wastoe vertelst holdt mie nuchter en waarm
en boven mien kop zug ik die grieze wolken
Ik bin blied dastoe hier bist
Blied dastoe hier bist
Wie zitten hier bie t gemoal van Electra
t Kon mie al nooit wat verschelen woar wie waren
Wie verzoepen onszulf in de draank van dien voader
Ik bin blied dastoe hier bist
Blied dastoe hier bist
Ik bin blied dastoe hier bist
Ik bin blied dastoe hier bist
Ik bin blied dastoe hier bist
Ik bin blied dastoe hier bist
En den zitten wie hier bie t gemoal van Electra
Wastoe vertelst holdt mie nuchter en waarm
en boven mien kop zug ik die grieze wolken
Ik bin blied dastoe hier bist
Blied dastoe hier bist
Ik bin blied dastoe hier bist
Ik bin blied dastoe hier bist
Ik bin blied dastoe hier bist
Wie zitten hier bie t gemoal van Electra
t Kon mie al nooit wat verschelen woar wie waren
Wie verzoepen onszulf in de draank van dien voader
Ik bin blied dastoe hier bist
Blied dastoe hier bist
Ien Lammerburen
Ien Lammerburen
Ien Lammerburen
