Golf Noa Golf
t Dubbelalbum Golf Noa Golf dij Harry Niehof lesten november uutbrocht, het twij kerakters. d’Eerste schieve, woarop twaalf nije nummers stoan, het e opnomen mit muzikoale begelaaiden van Herman Grimme en Johan Viswat. Dail twij van t album geft ons Harry Niehof in zien puurste vörm, zo as je hom mainsttied zain bie optredens, allenneg mit zien stem en n gitoar.
In Niehof zien meziek komt voak n soort van winsteghaid weerom. Zo wil e geern wel es vot, noar de wiedste kontrainen achter d’horizun, mor den ook weer noar huus. In t eerste nummer, Begun, komt e thuus van zo’n raaize, meschain wel dij Van Middelsom Noar Madrid.
Winsteghaid, joa doar binnen meer soorten van. Zo kin je uutkieken noar wat nog kommen mout. De Meermin Van Meerstad zit te wachten tot der indelk n moal wotter komt. Bie de laifde komt ook voak winsteghaid kieken. d’Aine het winst noar de laifde, d’aander van de laifde. En gounent mainen dat ze nooit genog laifde kriegen kinnen, dij binnen winsteg noar meer. Doar komt wel es ontraauw van, dat voak nait zunder gevolgen blift. In 1928 wuir doar al t laid Makin’ Whoopee over schreven. Dizze jazzy sikkom-klassieker is in Harry Niehof zien versie Dat Gait Van Joepie haiten goan.
Niehof kin ook goud nummers schrieven over de bekrompenhaid en t mistraauwen, woarmit volk van t pladdelaand noar vrumdelingen kikt. Dat kin e serieus, mor ook mit onderkoulde humor. In Doodstil konden lu nog wel es geliek hebben, mit heur bedenkens bie t gezelschop dij heur intrek nemt in n lege boerderij. Bie dat volk is wat loos, mor wat ze ommaans hebben? In elk geval, as ze weer votgoan is der ain perzoon minder bie. In t drijstemmege Kleurege Jaas (woarin Inki de Jonge en Carmen Schilstra te heuren binnen) sturen laandaarbaiders aine vot dij der aans uutzugt as zai. De vrumdeling wil helpen bie t oogsten, mor d’aarbaiders vinden dat e allenneg mor in de wege lopt. En t waark op t laand mout deurgoan, ‘dus wegwezen, doe!‘
Veur t twijde dail het Harry Niehof n aantal van zien oldere laidjes ook solo en akoestisch opnomen, dij den hail aans klinken as op zien albums Cuba Blues en Altied Onderwegens. Zo binnen Alles Veur Die, Grunnen Leeft en Swaarde Leegte van aal heur fraanje ontdoan, zunder dat ze minder staark worden binnen.
Dail twije bevat ook vief nije laidjes. Ook hier binnen teksten over winsteghaid bie, verlangen noar wat nait kin. Harry wil zoch overgeven aan t wilde, roege artiestenleven. Mor dat kin nog even nait, want hai zit net mit Kat op schoot. Wat ook nait zomor kin, is van Stad weerom goan noar t pladdelaand. Hai wol as pervinzioal overnijs begunnen, mor zien grunnegerschop was al vieventwinteg joar verlopen. As allochtoon mos e eerst mor es noar n Inburgeringscursus tou.
Veur n Grunneger is Harry Niehof best wel romantisch, zong hai zulf al es. Dat huift bie ons nait stoer te wezen. d’Ainvoudege romantiek van Lou Reed zien Perfect Day komt ook noar veuren uut de Grunneger omtoalen Schiere Dag.
Op Golf Noa Golf stoan veul schiere nummers. In Grunnen wait we allaank dat Harry Niehof zochzulf vonden het in de meziek in zien aigen toal. Nou is t de vroage, woarom de rest van Nederlaand hom nog nait vonden het. Mit zien daarde staarke spaigelploade is e de beste vertolker van de Grunneger blues, dij hail best noast de Drintse stoan kin.
