Grunneger legendes

Foto: RTV Noord

Pé Daalemmer & Rooie Rinus, doar kom je nooit van òf. Gelukkeg nait. Dij begun joaren 1980 in Stad woond of studaaierd het, mor dit markante duo nait ken, mout je ja wel stekedoof en stokblind west wezen. Dizze leventege legendes van de Grunneger meziekboudel binnen toch wereldvernuimd in Stad en Ommelaand.

In 1984 binnen Peter de Haan en Frank den Hollander der mit uutschaaid, mor aiglieks binnen ze nooit vot west. Ze kwammen noa n joar of wat weer in de Bende van Baflo Bill, dij loater Voorheen De Bende wuir (vleden joar nog mit pazzipanten Harry Niehof en Jan Veldman). In tied is sikkom elk jubeleum van t markante duo vierd. Heur dattegste konden ze den ook nait onderuut kommen. Mor nait morzo n reüniekonsert, woarin ze d’haile riege olle hits òfwaarken. Zo haren ze vief joar leden al dik feest vierd in de Martiniploazoa, doar konden ze nooit meer overhìn kommen.

Veur t eerst in joaren wuiren nije laidjes schreven, woar weer t eerliekse Pé & Rinus-gevuil in zit. In de theoatershow Old & Nij wordt vanzulf weerom keken op dij datteg joar, mor dat kin ook mit nije laidjes. Woar t kin, verwiezen dij wel noar t oldere waark. In de Dikke Rap kinst zeker tien direkte verwiezens noar bekende nummers vinden. Mor as ze zo’n olle hit in dizze tied schreven haren, hou zol dij nou den klinken? Dat heuren we in n vernijde Carnaval In t Noorden en de 2.0-versie van Plattelandsvrouwen, dij haldaal 2010 is. Vanzulf brengen ze nog n poar klassiekers te heuren, want n Pé & Rinus-optreden is nooit kompleet zunder Hoornse plas, Baukelien en Hee Doe.

De legendes binnen nog altied leventeg en hebben zoch vernijen kind, zunder te vergeten wèl en wat ze binnen. Zo kinnen nog wel n poar jubeleums vierd worden. Mit vief joar den mor weer?