W Series helpt vraauwen in de racerij

#RethinkRacing – foto: W Series

Aankom zotterdag gaait de W Series van start, n raceklasse bloots veur vraauwelke rieders. t Is veur t eerst in de geschiedenis van d’autosport dat zo’n klasse bestaait. Onder t motto ‘Rethink racing’ wil d’organizoatsie de meugelkheden veur vraauwen vergroten om tot de hogere autosportregionen deur te dringen. Vraauwen kommen nog te voak tegen n gloazen plefon aan, veurdat ze echt deurbreken kinnen. Nait deur gebrek aan talent, t ligt mainsttied aan t uutblieven van (financiële) steun. Veur de kampioene is der n haalf miljoun dollar aan priezengeld, om heur te helpen de volgende stap in heur loopboan te moaken. t Ultieme doul is om n vraauw in de Formule 1 te kriegen.

Veuruutlopend op de serie binnen de mainens nait allenneg positief. Veul mannelke racefans nemen t nait serieus. Op facebook en autsportforums worden de gebrukelke grappen moakt over richtensgevuil en inparkeren. Ook seksistische opmaarkens over de coureurs, t prehistorische ‘de vraauw het mor ain recht en dat is t aanrecht’ en zulfs #MeToo kommen veurbie. In de serieuze reaksies gaait t mainsttied over de vroag of vraauwen liggoamelk en/of mentoal wel staark genog binnen om op t högste nivo mit te doun.

n Aantal vraauwelke coureurs zugt der ook niks in. ‘Wat n treurege dag veur d’autosport’, schreef Pippa Mann op Twitter. Volgens de Britse coureur uut o.m. de IndyCar Series (6 dailnoames aan de Indy 500) kaizen meugelke geldschaiters derveur om vraauwelke coureurs te segregeren in ploats van dat ze ze steunen. ‘k Bin daip ontgoocheld om zo’n historische stap achteruut mit te moaken.’ De Duutse Formule 3-coureur Sophia Flörsch begript d’argumenten, mor vindt dit nait de goie oplözzen. ‘Vraauwen binnen steun neudeg op de laange termien en betraauwboare sponsors.’ Zai wil t gewoon tegen de besten in de sport opnemen. En dat binnen toch veuraal manlu. Veul mannelke coureurs lieken gain uutgesproken mainen te hebben of kommen doar nait veur uut.

De coureurs van de W Series 2019 – foto: W Series

De W Series kreeg aanmeldens van 55 vraauwen. In n vaardoagse selectieronde binnen dij uutgebraaid test op verschaaiden vlakken: vanzulf op heur rievoardegheden, mor ook liggoamelke fithaid, mentoale bekwoamhaid, psychologische en psychometrische aspecten, communicatieve voardegheden enz. Der gingen 28 kandidoaten deur noar de twijde ronde, woarin o.m. de te bruken racewoagen test wuir. Dat het uutendelk n startveld van achttien coureurs aanbrocht.

Doaronder de 24-joarege Nederlandse Beitske Visser. Zai begunde as viefjoarege in karting en zit vanòf heur zeuventiende in d’autosport, veurnoamelk in ainzitters. Over 2012 en 2013 won ze drij races in de ADAC Formel Masters en wuir ze twij moal 8e in d’endstand van t kampioenschap. Doarnoa ree ze drij joar in de fysiek zwoare Formule V8 3.5, mit in twij races n viefde ploatse as beste rezeltoat. In de GP3, n juniorklasse in t veurpergram van de Formule 1, het ze twij moal n race reden. As eerste vraauw wuir ze opnomen in t juniorenteam van Red Bull Racing, mor mos doar noa ain teleurstellend seizoen in de ADAC Formel Masters alweer vot. Tot zowied het Visser 118 wedstrieden reden, mit 7 overwinnens en nog 11 aander podiumploatsen.

De Britse Jamie Chadwick was elf joar toun ze veur t eerst op n kart ree. As vieftienjoarege kwam ze in d’autosport via de race-oplaaiden van t Ginetta Junior Championship. In 2015 wuir ze, soam mit heur mannelke teamgenoot Ross Gunn, kampioen in de GT4-klasse van t British GT Championship. Ze was toun 17 joar en doarmit, noast d’eerste vraauw, de jongste coureur ooit dij kampioen wuir. Vleden joar won ze as eerste vraauw n wedstried in de Britse Formule 3. In de winter van 2018-2019 dee ze mit aan de MRF Challenge, woarin ze as eerste vraauw de titel won.

De coureur mit de mainste ervoaren is Alice Powell, dij al 203 races in verschaaiden klasses reden het. Doarvan won ze 23 en ston ze in nog 49 op t podium. In 2010 wuir ze kampioen in de British Formula Renault Championship. In 2012 was ze d’eerste vraauw dij punten scoorde in de GP3. In 2014 won ze de AFR Series. Toun mos ze stoppen wegens gebrek aan financiële steun.

d’Organizoatsie van de W Series het officieel gain uutsloagen bekend moakt van de testdoagen. t Ging volgens de wedstriedlaaiden nait om snelle rondetieden, mor meer om kennismoaken mit de woagen. Toch kwam via Twitter n foto noar boeten van de tiedwoarnemen, mit de tieden van ain dag. Doaruut bleek dat dizze drij vraauwlu bovenaan stonden, mit allenneg de 18-joarege Spoanse Marta Garcia nog veur zoch. Meugelk geft dit toch aan dat zai de grootste kanshebbers op goie rezeltoaten binnen.

Coureurs as Pippa Mann en Sophia Flörsch willen tegen manlu racen en zoch nait ‘wegzetten’ loaten in n apaarde raceklasse. Stellen ze doarmit terecht dat de W Series onneudeg is, of zulfs onwìnselk? Zo zol t wel wezen mouten. n Vraauw dij n volgende stap moakt, komt ja toch weer in dij mannenwereld te lande. De klasse kin vraauwelke coureurs wel zichtboarder moaken, woardeur ze n goud veurbeeld wezen kinnen veur wichter om coureur te worden. Zichtboarhaid moakt de riedsters ook interessanter veur sponsoren. Veur de dailneemsters mout t n ekstroa meugelkhaid wezen om kennis en ervoaren op te doun, as t kin noast n klasse woarin ze t tegen mannen opnemen. Uutendelk mout n raceklasse apaart veur vraauwen nait neudeg wezen. De bedoulen van de W Series mout veuraal wezen om uut te vinden of – en zo joa, woar – vraauwelke coureurs tekörtschaiten veur t moaken van n volgende stap in heur loopboan. As ze uutvinden wat veur vraauwen de juuste aanpak is om aan de top te kommen, is dat weerdevolle kennis om te dailen mit coureurs, trainers, teams en autosportbonden. De W Series is pas echt n sukses as ze zochzulf overbodeg wait te moaken.

De wedstrieden in de W Series worden verreden rondom dij van de Deutsche Tourenwagen Masters. t Kampioenschap gaait over zes races. Aankom zotterdag 4 maai is d’eerste wedstried in Duutsland op de Hockenheimring. De W Series dut ook t TT-circuit van Azzen aan: de thuusrace veur Beitske Visser is op 20 juli. Zai de klender en meer info op de webstee van de W Series. Tickets binnen te verkriegen via de webstee van de DTM. De wedstrieden worden in Nederland live uutzonden op Ziggo Racing. Op Ziggo Sport binnen loater soamenvattens te zain. De NOS brengt in de race-weekends t wiedere nijs in heur sportuutzendens.

Wèllen: W Series, GP Update.net, Motorsport.com, Wikipedia

Geef een antwoord

Het e-mailadres wordt niet gepubliceerd.