Deuntjes veur n zulvern cent
In 2001 ging op Radio Noord t pergram Twij Deuntjes Veur Ain Cent van start. Elke waarkdag tussen 18 en 19 uur prezenteerde Henk Scholte meziek in t Grunnegs en in aander klaaine toalen. Nummers van populaire Grunneger artiesten wuiren òfwizzeld mit meziek van nijkommers in de streektoal en mit olle, voak al vergeten opnoames uut t RONO-archief.
Der was ook aandacht veur meziek in aander dialecten en streektoalen in Nederland. Wieder luit Henk ons kennismoaken mit folk en wereldmeziek uut aal uuthouken van Europa en ver doarboeten, tot aan meziek in t Afrikaans en Mongolische keelgezangen tou. Om n braider aanbod aan Grunneger meziek te kriegen, wuiren Twij Deuntjes-sessies organiseerd, mit live-optredens in de studio. Smangs schoven artiesten aan om te proaten over de meziek. De formule bleek te waarken, op n tiedstip dat mainsttied de tv aanging, bleven veul Grunnegers nog n uurtje luustern noar Radio Noord.
In t noajoar van 2016 zag t der even noar uut dat Twij Deuntjes … van de radio verdwienen ging. Vanuut Den Hoag kregen de regionoale omroupen bezunegens oplegd en n veurgenomen fusie van RTV Noord mit aander omroupbedrieven was mislukt. Doardeur mos Noord zoch redden mit n miljoun minder in t joar. Dat tekört zol opvongen worden deur mit de populairste pergrammen op radio en tv te stoppen. In t geval van Twij Deuntjes … zol dat nait veul aanbrocht hebben, want Henk muik t pergram tegen bloots n onkostenvergouden. De plannen van Noord muiken nogal wat lös bie d’artiesten en de luusteroars, dij votdoadelk mit nander n actie begunden om heur gelaifde pergram op de zender te holden. Mit sukses, al was der n veraandern: Twij Deuntjes … kon blieven, mor ging noar de zundagmörgen tussen 10 en 12. Doar bleef t onverminderd populair.
[Wordt vervolgd]
