Sound van Sodom
Alex Luttjeboer is al vatteg joar aan d’loop in de meziek. Dat was altied mit Engelstoaleg waark. Aan zingen in t Grunnegs haar e nog nooit docht. Tot twij joar leden, toun hai mit zien band Alex Julius & The Chaplains bie Radio Noord te gast was in Café Martini veur t promoten van n nije Engelstoalege single. Prezentoator Eric Bats doagde Luttjeboer uut om es n nummer in t Grunnegs op te nemen. Hai nam dat eerst nait serieus, mor haar al gaauw de tekst veur n eerste single op pepier.
Funky Vouten was votdoadelk n sukses: t laid ston bie Radio Noord 15 weken in de Noord 9 en kreeg n twijde ploatse as högste noteren. Nog vaar singles volgden, dij ook aal in de hitlieste van Radio Noord kommen binnen. Siepeltjevlaais kwam zulfs op nummer 1. Boetendes kregen ze de Bosklopper Bokoal uutlangd veur t Leed Is Leden, as beste Grunnegstoalege single van 2018. Mit d’overstap op t Grunnegs wuir de bandnoam veraanderd in Nulviefteg. En nou is der t album Heur es … Noast de vief singles dij al uutbrocht waren, stoan doar nog vief nije nummers op.
Muzikoal veraanderde der aiglieks niks: Nulviefteg is gewoon de Grunnegstoalege veurtzetten van The Chaplains, dus n pop-/rockband dij mit verschaaiden meziekstielen uut de vouten kin. Zulf nuimen ze t wel n omgevalen ploatenkaaste. Zo binnen der invlouden te heuren van rock en blues. Funky Vouten kon wel es d’eerste Grunneger funkploade wezen. Wieder heuren we reggae, soul en het de nije single Liflafjes n jazzy inslag. In de mainste nummers wordt muzikoal goud uutpakt, mor t leste laid Voader & Zeun is n akoestische ballad.
Verschaaiden artiesten en bands – nait altied de besten – vuilen de noodzoak n laid op te nemen over d`eerdbevens en de gaswinnen in Grunnen. Mit t Leed Is Leden het Nulviefteg doar aine van de beste nummers over moakt. Alex Luttjeboer zugt in zien doagelks waark as stukadoor de schoade dij lu aan heur huzen hebben. Zukse schoade kin hersteld worden. ‘Meer kin k ook nait doun / mor k wil der wel wezen / om lu bie te stoan / terwiel t leed allaank is leden’. Vanuut n aigen ervoaren kin e dus vertellen hou de zoaken derveur stoan. t Is n staarke en overtugende tekst in n krachteg nummer. t Laid het zien hitpotentie woarmoakt deur acht weken in de Noord 9 te verblieven en terecht De Bosklopper Bokoal in de wacht te slepen. As je n bosschop overbrengen willen, mout je t mit zo’n laid doun, dat het de band goud begrepen.
Mor t binnen nait allenneg serieuze teksten, in veul nummers zit (zulfreloativerende) humor. Magst ja ook wel n moal lagen om meziek. In Funky Vouten zingt Alex dat hai nait daanzen kin. Siepeltjevlaais gaait over n vent dij t nait goud dut bie de vraauwlu, benoam omreden dat hai zo’n moekesjonkie is. In Liflafjes hebben ze de gugel mit Grunneger ‘boerenvreters’ dij niks hebben mouten van dij nijmoodse eterij van tegenwoordeg,
Luttjeboer is n echte Winschoter. Dat heurst in zien toal. Veur de Twijde Wereldoorlog haar Winschoot n grode Jeudse gemainschop. Doardeur bevat t Winschoter Grunnegs veul Jiddische en Bargoense (dat veul aan t Jiddisch ontlaint) woorden. Dij toal zel bie leutjen aan verdwienen, mor Luttjeboer pebaaiert t nog n beetje in ere te holden. Siepeltjevlaais gaait over ‘n ainzaalm van n vent’, wat n biezunder figuur is. In meer nummers zitten woorden dij n manspersoon aanduden, zo as ‘binke’ en ‘boogerd’. Bepoalde woorden kinnen nog wel es in aander dailen van (Oost-)Grunnen zegd worden. n Woord as ‘poter’ (vot, verdwenen) bruuk ik as Veenkelonioal ook en ‘ik heb siezen in de buutse’ (senten, geld) heur k ook wel boeten Winschoot. Mor bepoalde woorden binnen zó ploatsgebonden dat ze zulfs nait in t Grunneger woordenbouk van Ter Laan veurkommen.
Alex Luttjeboer is al vatteg joar aan d’loop in de meziek en het in meerdere bands speuld. Hai mag zoch onderdail van de sound van Sodom nuimen. Zien aigen toal verstaarkt dat geluud en brengt t bie n nij pebliek. Mit Heur es … is de verschaaidenhaid aan meziekstielen in ons streektoal weer n beetje groter worden. Doarmit is Nulviefteg n verrieken van de Grunneger meziek.
